काठमाडौं । नेपाल प्रिमियर लिग (एनपीएल) को भव्य उदघाटनसँगै लिगको पहिलो खेल काठमाडौँ गोर्खाजले प्रभावशाली जित आफ्नो नाममा पारेको छ ।

कीर्तिपुरस्थित त्रिवि क्रिकेट मैदानमा सोमबार सम्पन्न खेलमा काठमाडौँले जनकपुर बोल्ट्सलाई ५ विकेटले पराजित गर्दै विजयी सुरुआत गरेको हो । जनकपुरले दिएको १३१ रनको लक्ष्य काठमाडौँले १८ ओभरमै भेट्टायो । काठमाडौँका शीर्ष–क्रमका ब्याटरले जिम्मेवारीपूर्ण प्रदर्शन गरे ।

बेन चाल्र्सवर्थ – ४६ रन

आकाश त्रिपाठी – ३९ रन

मिलिन्द कुमार – १९ रन

जोन सिम्पसन – १३ रन

मोहम्मद आदिल आलम – ८ रन

भीम सार्की – ३ रन
जनकपुरका पाँचै जना बलरले एक–एक विकेट लिए, जसमा अनिल साह, ललित राजवंशी, सञ्जय कृष्णमूर्ति, किशोर महतो र जान निकोल लफ्टी–इटोन रहेका छन् ।

पहिले ब्याटिङ गर्दै जनकपुर ६ विकेटमा १३० रन
लिगको उद्घाटन खेलमा जनकपुरले अपेक्षित ठूलो स्कोर बनाउन नसके पनि आसिफ शेख को उत्कृष्ट अर्धशतक टीमका लागि मुख्य आकर्षण बन्यो । आसिफले ४१ बलमा ५० रन, ६ चौका र १ छक्का प्रहार गरे । मयन यादवले ३४ रन, लाहिरु समरकूनले २२ रन, लाहिरु मिलन्थाले ७ रन, र रुपेश सिंहले ४ रन जोडे । काठमाडौँका बलरमध्ये मिलिन्द कुमार चम्किए, जसले ३ विकेट लिए । त्यस्तै करण केसी, शहाब आलम र सन्तोष यादवले एक–एक विकेट हात पारे ।
भोलि दुई रोमाञ्चक खेलहरू

मंगलबार एनपीएलमा दुई खेल हुनेछ
चितवन राइनोज बनाम कर्णाली याक्स — बिहान ११ः४५
विराटनगर किंग्स बनाम पोखरा एभेन्जर्स — अपराह्न ४ः००
उदघाटन खेलमै काठमाडौँ गोर्खाजले देखाएको सशक्त प्रदर्शनले यस वर्षको लिग रोमाञ्चक हुने संकेत दिएको छ ।