काठमाडौँ । सर्वोच्च अदालतबाट थुनामुक्त भएका मेडिकल व्यवसायी दुर्गा प्रसाईंले आफ्नो नेतृत्वमा सञ्चालित ‘नागरिक बचाउ महाअभियान’ को आन्दोलन स्थगित नभई मोडिएको स्पष्ट गरेका छन् । सात दिनको प्रहरी हिरासत बसाईपछि बाहिरिने क्रममा उनले अदालतको आदेशले ‘देशमा न्याय मरेको छैन’ भन्ने विश्वास बलियो बनाएको बताए ।

प्रसाईंले प्रधानमन्त्री सुशीला कार्की र गृहमन्त्री ओमप्रकाश अर्यालको विशेष आग्रहपछि आइतबारबाट सुरु हुने भनिएको अनिश्चितकालीन आम हड्ताल र आन्दोलनको ‘मोडालिटी’ परिवर्तन गरिएको जानकारी दिएका छन् । ‘आन्दोलन रोकिएको होइन, मोडालिटी बदलिएको हो’, प्रसाईंले भने, ‘सरकारले माग सुन्ने, समाधानतर्फ जाने इच्छा देखाएकाले वार्तामा गएको हुँ ।’

उनले नागरिक बचाउ महाअभियानले उठाएका जीविकोपार्जन, गरिब जनतालाई समृद्ध बनाउने जस्ता मुख्य एजेण्डाका विषयमा सरकार वार्तामा बस्न तयार भएको दाबी गरे । शनिबार राति नै प्रधानमन्त्री कार्यालयमै दुई पक्षबीच विस्तृत छलफल र सहमति बनेको उनले उल्लेख गरे।

यसअघि अभिव्यक्तिका कारण सार्वजनिक शान्ति भंग भएको आरोपमा गत सोमबार मध्यराति भक्तपुरस्थित निवासबाट पक्राउ परेका प्रसाईंलाई सर्वोच्च अदालतले बन्दी प्रत्यक्षीकरणको मुद्दामा रिहा गर्न आदेश दिएको थियो । अदालतले उनलाई छोराको जिम्मा लगाएर मुक्त गर्न निर्देशन दिएपछि आइतबार उनले बाहिरिएका हुन् ।

प्रसाईंले आइतबारदेखि अनिश्चितकालीन आम हड्ताल सुरु गर्ने घोषणा गरेका थिए, जसलाई निष्प्रभावी बनाउन प्रहरीले पक्राउ गरेको थियो । तर आन्दोलन तयारी जारी राखेपछि सरकार–प्रसाईं पक्षबीच वार्ता भएको र कार्यक्रम परिमार्जन गर्ने सहमति बनेको हो । अब हुने वार्तामा प्रसाईं स्वयं सहभागी हुनेछन् ।