काठमाडौं । ब्राजिलको सर्वोच्च अदालतले पूर्व राष्ट्रपति जैर बोल्सोनारोलाई २७ वर्ष तीन महिनाको जेल सजाय सुनाएको छ । उनी विद्रोहको षड्यन्त्र रच्नुका साथै आफ्ना वामपन्थी प्रतिद्वन्द्वी एवं वर्तमान राष्ट्रपति लुला दा सिल्भाको हत्या गर्ने योजना बनाएको आरोपमा दोषी ठहरिएका हुन् ।

न्यायाधीश अलेक्जान्ड्रे डे मोरेसले भने, ‘मुद्दाको अन्तिम निर्णय भइसकेको छ, अब पुनरावेदन हुन सक्दैन।’ अब ७० वर्षीय बोल्सोनारोले राजधानी ब्रासिलियाको जेलमा सजाय भोग्न थाल्ने छन् । उनी शनिबारदेखि हिरासतमा छन् । घरमै नजरबन्दमा रहँदा निगरानी यन्त्र हटाएपछि उनी पक्राउ परेका थिए । पछि उनले यन्त्र खोल्ने प्रयास गरेको स्वीकार गरे पनि भाग्ने मनसाय नरहेको बताएका थिए । न्यायाधीश मोरेसले बोल्सोनारोको स्वास्थ्यलाई ध्यानमा राख्दै उनलाई पूर्णकालीन चिकित्सा हेरचाहको व्यवस्था गर्न आदेश दिएका छन् ।