काठमाडौं । नेपाल प्रिमियर लिग (एनपीएल) सिजन २ अन्तर्गतको बिहीबारको दोस्रो खेलमा पहिलो जित निकाल्न पोखरा एभेन्जर्सले जनकपुर बोल्ट्सलाई १५६ रनको लक्ष्य प्रस्तुत गरेको छ ।

सिद्धार्थ बैंक नेपाल प्रिमियर लिग (एनपीएल)मा बिहीबार टस जितेर ब्याटिङ गरेको पोखराले ६  विकेटको क्षतिमा एक सय ५५ रन बनाएको हो। जनकपुरविरुद्ध राम्रो सुरुवात गरेको पोखराको मध्यक्रमका ब्याटर क्रिजमा टिक्न नसक्दा जनकपुरविरुद्ध विशाल योगफल तयार पार्न असफल बन्यो।

पोखरा एक समय ८.३ ओभरमा एक विकेटको क्षतिमा ६१ रनको अवस्थामा थियो। पोखराले चार रन बनाउन चार विकेट गुमाएको थियो।

तृतराज दास २९ रन बनाउँदा रनआउट भए। सुमित बर्मा ५० र किरण ठगुन्ना एक रनमा अविजित रहे। सुमितले २८ बलमा दुई चौका र चार छक्का प्रहार गर्दै अर्धशतक पूरा गरे।

पोखराका ओपनर दिनेश खरेल ३८ बलमा दुई चौका र तीन छक्का प्रहार गर्दा ३८ रनमा  अनिल शाहको बलमा माज सदाकतको हातबाट क्याच आउट हुन पुगे।

अर्का ओपनर आडम रसिङटोन २४ रन बनाउँदा सञ्जय कृष्णमूर्तिको बलमा जान निकोन लफ्टी इटोनको हातबाट क्याच आउट भए। डान डाउथवेट सात रन थप्दै आउट भए। कप्तान कुशल भुर्तेल गोल्डेन डकआउट भए। जिम्मी निसम एक रनमा आउट भए।

जनकपुरका लागि सञ्जय कृणमूर्तिले तीन विकेट लिए। उनले आफ्नो स्पेलमा २१ रन खर्चे। अनिल साह र ललित राजवंशीले एक-एक विकेट लिए।