काठमाडौँ-नेपाली कांग्रेसका केन्द्रीय सदस्य एवं शिक्षा विभाग प्रमुख नैनसिंह महरले पार्टीलाई एकताबद्ध बनाएर यथाशीघ्र निर्वाचनमा होमिने वातावरण निर्माण भइरहेको र पार्टीको आगामी बैठकसम्ममा पार्टीका सबै समस्या समाधान हुने बताउनुभएको छ ।

स्ववियु परिषद् नेपालको राष्ट्रिय अधिवेशन–२०८२ को उद्घाटन सत्रलाई सम्बोधन गर्दै उहाँले पार्टी विधान र संविधानको सीमाभित्रै रहेर देश र कांग्रेसभित्रका सबै समस्याको निकास सम्भव रहेको बताउनुभयो ।

शीर्ष नेतृत्व तहमा र अन्य समूहका बीचमा फरकफरक ढङ्गले गहन छलफल चलिरहेको छ “पार्टी एकताबद्ध हुन्छ र यथाशीघ्र निर्वाचनमा होमिने वातावरण बन्दैछ”, नेता महरले भन्नुभयो, “अहिलेकै केन्द्रीय समितिमार्फत निकास निकाल्न हामी सबै प्रयासरत छौँ ।”

उहाँले पार्टी नेतृत्वले विगतका अभ्यासहरूको समीक्षा गर्दै स्पष्ट मार्गचित्र (रोडम्याप) दिनुपर्नेमा जोड दिनुभयो । उहाँले भन्नुभयो, “हिजोदेखि गरी आएका वा अवलम्बन गरेका के–केलाई निरन्तरता दिने, के–केलाई परिमार्जन गर्ने र के–केलाई पूर्णतः निषेध गर्ने त्यसको रोडम्याप नेतृत्वले दिन सक्नुपर्छ । भोलिका कर्णधार पुस्ताले स्पष्टता खोजेको छ ।”नेता महरले ‘जेनजी’ पुस्ताको प्रतिनिधिका रूपमा रहेका स्ववियु परिषद्का प्रतिनिधिहरूले समाजमा फैलिँदै गरेको राजनीतिक चेतनालाई सही दिशा र गति दिनुपर्ने बताउनुभयो ।

नेपालको शिक्षा नीति प्रविधि र कृत्रिम बौद्धिकता (एआई)मा आएको परिवर्तनअनुसार समयसापेक्ष हुनुपर्ने जरुरी रहेको उल्लेख गर्दै उहाँले नेपालमै उच्च शिक्षा अध्ययनको सुरुआत पहिलो जननिर्वाचित प्रधानमन्त्री एवं कांग्रेसका संस्थापक बिपी कोइरालाले त्रिभुवन विश्वविद्यालय स्थापना गरेको प्रसङ्ग सुनाउँदै महरले शिक्षामा २० प्रतिशत बढी लगानी आवश्यक रहेको बताउनुभयो ।

आफू नेपाल विद्यार्थी सङ्घ (नेविसङ्घ) को अध्यक्ष हुँदा रूपान्तरणको एजेन्डा राख्दै समावेशी विधान निर्माण गरेको स्मरण गर्दै नेता महरले ऐतिहासिक सङ्घर्षपछि नेविसङ्घमा ३२ र स्ववियुमा २८ वर्षे हदबन्दी लगाएको विषय आज झनै सान्दर्भिक बनेको दाबी गर्नुभयो ।पार्टीभित्र युवाको सम्मानजनक उपस्थितिको वकालत गर्दै आएका उहाँले जारी केन्द्रीय समिति बैठकमा आफूले ठोस प्रस्ताव राखेको जानकारी दिनुभयो ।