कैलाली । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ ले १५ वाम घटकलाई एक ठाउँमा ल्याएर नयाँ रेकर्ड बनाएको बताएका छन् । सुदूरपश्चिमको धनगढीमा आयोजित एकता सन्देश सभालाई सम्बोधन गर्दै उनले वामपन्थी एकताको आवश्यकतामा जोड दिँदै भने, ‘हाम्रो ध्यान एमालेतिर पनि छ । एमालेभित्रका सबै वामपन्थी, देशभक्त र क्रान्तिकारीहरूलाई पनि यही पार्टीमा केन्द्रित हुनुपर्छ भन्ने हाम्रो दृढ मान्यता हो । सबैलाई अट्न सक्ने भएकाले नेपाली कम्युनिष्ट पार्टी गठन गरेका हौं ।’

प्रचण्डले अब पार्टीमा कुनै माओवादी वा एकीकृत समाजवादी नछुटेको दावी गरेका छन् । उनले एमालेभित्र रहेका क्रान्तिकारी कार्यकर्ताहरूलाई गहिरो रुपमा सोच्न र एकताबद्ध भएर अघि बढ्न आग्रह गरे । धनगढीमा पहिलो पटक आयोजित सन्देश सभामा प्रचण्डले आर्थिक व्यवस्थापनको चुनौती समेत औंल्याए । उनले भने, ‘आजको सभा पहिले जस्तै ठूलो रकम खर्च गरेर आयोजना गर्न नसकिएकाले जनताको उपस्थिति कम हुन सक्छ भन्ने चिन्ता थियो । विगतमा यस्ता सभामा ठूलो खर्च हुन्थ्यो, तर यस पटक केन्द्रबाट कुनै रकम पठाउन सकिएन।’

उनले सुरक्षा व्यवस्थालाई पनि चुनौतीपूर्ण बताएका छन् । ‘धनगढीमा केही दिनअघि अन्य पार्टीका कार्यक्रममा व्यवधान आएको खबर हामीले सामाजिक सञ्जालबाट देखेका थियौं । तर यहाँका नेता–कार्यकर्ताले ती सबै चुनौतीहरूको बलियो उत्तर दिनुभयो र सभा सफल बनाउनु भयो’, प्रचण्डले भने । नेपाली कम्युनिष्ट पार्टीले देशका सातै प्रदेशमा सन्देश सभा आयोजना गर्ने योजना बनाएको छ ।