काठमाडौं । नेपाली कांग्रेसका नेता डा. सुनिल शर्माले रवि लामिछानेले चुनावी अभियानमा सहभागी हुने कानुनी अधिकार राख्नु पर्ने बताएका छन् । नेता शर्माले भने, ‘रवि अपराधी होइनन्, त्यसैले उहाँले स्वतन्त्र रूपमा आफ्नो विचार राख्ने र चुनावी अभियानमा भाग लिन पाउनु पर्छ ।’

शर्माले भारतको सर्वोच्च अदालतले अरविन्द केजरीवाललाई भ्रष्टाचार र सम्पत्ति शुद्धीकरणको आरोपमा छोटो अवधिको जमानत दिँदा दिएको सन्देश उदाहरण स्वरूप प्रस्तुत गर्दै भने, ‘चुनाव जनहितको विषय हो । कुनै व्यक्ति दोषी प्रमाणित नहुँदासम्म राजनीतिक प्रक्रियामा सहभागी हुनबाट रोक्नु हुँदैन । अदालतले स्पष्ट रूपमा भनेको छ कि अपराध प्रमाणित नभएसम्म राजनीतिक सहभागिताबाट रोक्नु समाजका लागि खतरा होइन ।’

उनले थपे, ‘यही न्यायिक सिद्धान्तको आधारमा, रवि लामिछाने आफू उम्मेदवार बन्न कानुनी रूपमा रोकिएका भए पनि, चुनावी अभियानमा सहभागिता जनाउने अधिकार उनीसँग रहनु पर्छ । उनी अहिले सहकारी ठगी प्रकरणमा अभियुक्त मात्र हुन् र कुनै अपराधमा दोषी ठहर भइसकेका छैनन् ।’

डा. शर्मा अनुसार लोकतान्त्रिक मुलुकमा कुनै पनि शीर्ष राजनीतिक व्यक्तित्वलाई पूर्ण रूपमा चुनावी प्रक्रियाबाट अलग राख्नु प्रत्यक्ष रूपमा प्रतिस्पर्धाको निष्पक्षता कमजोर पार्ने अभ्यास हो । यो केवल कुनै व्यक्ति वा पार्टीको पक्षमा मात्र नभई नेपालको समग्र लोकतान्त्रिक मूल्य र राजनीतिक निष्पक्षताको संरक्षणको पक्षमा रहेको विषय हो ।

नेता शर्माले निष्कर्षमा भने, ‘हामीले प्रतिस्पर्धालाई दबाएर होइन, खुलेर सामना गरेर बलियो लोकतन्त्र निर्माण गर्नुपर्छ । यस्ता न्यायिक र राजनीतिक नजिरहरूले हाम्रो लोकतान्त्रिक चरित्र सुदृढ बनाउँछन् र न्यायिक प्रक्रियाको विश्वसनीयता पनि कायम राख्छन् ।’ नेता शर्माले केहि दिनअघि पूर्व गृहमन्त्री समेत रहेका रास्वपा सभापति लामिछानेलाई ललितपुरको नख्खु कारागारमै पुगेर भेटेका थिए ।

भेटपछि उनले अघिल्लो सरकारले लामिछानेमाथि प्रतिशोध साँधेको बताएका थिए । उनले अघिल्लो सरकारको पालामा एउटै प्रकृतिको मुद्दामा अरुलाई छुट दिइएको बताउँदै लामिछानेमाथि भने भिन्नै व्यवहार गरिएको टिप्पणी गरेका थिए । उनले जेनजीको बलमा बनेको सुशीला कार्की नेतृत्वको सरकारले रविको मुद्दामा चासो देखाउनु पर्ने बताउँदै उनी भाग्छन् भन्ने लागे आफू कागजमा औठाछाप लगाएर जिम्मा लिन तयार रहेको बताएका थिए ।

Delhi Liquor Policy मा भएको भ्रष्टाचार र सम्पत्ति शुद्धीकरण जस्तो गम्भिर मुद्धाको अभियुक्त अरविन्द केजरीवाललाई चुनावको समयमा,भारतको सर्वोच्च अदालतले दिएको छोटो अवधिको जमानतले एउटा महत्वपूर्ण सन्देश दिएको थियो, चुनाव जनहितको विषय हो र कुनै व्यक्ति दोषी प्रमाणित नहुँदासम्म… pic.twitter.com/NEMzrpIRmk

— Dr.Sunil kumar sharma (@dr_sunilksharma) November 29, 2025