काठमाडौं । वैकल्पिक राजनीतिक आन्दोलनलाई एकीकृत रूपले अघि बढाउने उद्देश्यसहित राष्ट्रिय स्वतन्त्र पार्टी (रास्वपा) र विवेकशील साझा पार्टी औपचारिक रूपमा एक भएका छन् । काठमाडौंमा आयोजित विशेष समारोहमा दुबै दलका शीर्ष नेताहरूले पाँच बुँदे एकीकरण सहमतिमा संयुक्त रूपमा हस्ताक्षर गर्दै नयाँ राजनीतिक यात्राको घोषणा गरेका हुन् ।

समारोहमा रास्वपातर्फबाट कार्यबाहक सभापति डोलप्रसाद अर्याल र नेता डा. स्वर्णिम वाग्लेले हस्ताक्षर गरे भने विवेकशील साझातर्फ अध्यक्ष समीक्षा बाँस्कोटा र उपाध्यक्ष प्रकाशचन्द्र परियारले कागजी प्रक्रिया पूरा गरेका छन् । एकीकरण कागजमा उल्लेखित मुख्य सहमतिहरूमा वैकल्पिक राजनीतिको जग बसाल्न महत्वपूर्ण भूमिका खेलेका स्व. उज्वल थापा तथा ‘विवेकशील अभियान’को योगदानलाई आधिकारिक रूपमा मान्यता र दस्तावेजीकरण गर्ने प्रावधान प्रमुख रूपमा रहेको छ । त्यस्तै, महाधिवेशनसम्म कार्यान्वयन हुने गरी गठन गरिएको ‘विशेष संयन्त्र संघीय नेतृत्व मञ्च’ मा विवेकशील साझाबाट आउने नेताहरूलाई आपसी सहमतिमा मनोनयन गरिने उल्लेख छ । मञ्चका सदस्यहरूलाई केन्द्रीय समितिका सदस्यसरहको वरियता र भूमिकासमेत प्रदान गरिनेछ ।

विवेकशील साझा पार्टीबाट एकीकृत संरचनामा प्रवेश गर्ने सदस्य एवं सल्लाहकारहरूको जिम्मेवारी तोक्दा योग्यता, समावेशिता र सार्वजनिक छविलाई आधार मान्ने सहमति पनि दस्तावेजमा समेटिएको छ । एकीकरणपछि पनि पार्टीको नाम ‘राष्ट्रिय स्वतन्त्र पार्टी’ नै रहनेछ भने झण्डा र चुनाव चिन्ह-निलो पृष्ठभूमिमा सेतो घेरा र बीचमा निलो घण्टी—साविककै रूपमा कायम राखिनेछ ।

दुवै दलले निर्वाचन आयोगमा आवश्यक कानुनी प्रक्रिया पूरा गर्न आवश्यक कागजात शीघ्र तयार गर्ने र पार्टीका नाममा रहेका चल–अचल सम्पत्ति व्यवस्थित गर्न परस्पर सहमतिका आधारमा कदम चाल्ने प्रतिबद्धता जनाएका छन् । एकीकृत रास्वपाले लोकतान्त्रिक सुशासन र समुन्नतिको एजेन्डामा एकजुट भई अघि बढ्न सबै सुसंस्कृत, परिवर्तनकामी तथा वैकल्पिक राजनीतिक शक्तिहरूलाई पनि साथ दिन आह्वान गरेको छ ।