काठमाडौं । राष्ट्रिय स्वतन्त्र पार्टी (रास्वपा) का उपसभापति डा. स्वर्णिम वाग्लेले सस्तो तथा पुनरवितरणमुखी राजनीतिले देशलाई अघि लैजान नसक्ने बताएका छन् । रास्वपा र विवेकशील साझा पार्टीबीच एकता घोषणा कार्यक्रममा बोल्दै उनले समाज रूपान्तरणका लागि अवसरको समानतामा आधारित राजनीतिलाई अघि बढाउनुपर्ने बताए ।

‘हामी जे बनाउन भनेर लागिरहेका छौं, त्यो समाज बुझ्न जरुरी छ,’ उनले भने, ‘पुनरवितरणको—अर्थात् सस्तो—राजनीति खारेज गरेर अवसरहरूको समानताको राजनीतिबाट अघि बढ्नुपर्छ ।’वाग्लेले मुलुकको अर्थतन्त्रको आकार विस्तार गर्न आवश्यक रहेको उल्लेख गर्दै समाजका बेथिति र समस्याको जरा बुझेर समाधानतर्फ उन्मुख हुनुपर्नेमा जोड दिए ।

उनले भने, ‘यो समाज हामी जे बनाउन भनेर लागेका छौं त्यो बुझ्न जरुरी छ । मुलुकको अर्थतन्त्रको आकार ठूलो बनाउनुपर्छ । हामीले आजको दिनमा १० वर्षपछि राष्ट्रिय स्वतन्त्र पार्टीको आफ्नै दार्शनिक आधार के हो भनेर यो सोच्नुपर्ने हुन्छ । अहिलेको लोकतन्त्रलाई थप स्वच्छ बनाएर अगाडि बढ्नुपर्छ ।’