काठमाडौं । नेपाली सांगीतिक क्षेत्रमा आफ्नै पहिचान बनाएकी गायिका सत्यकला राई राष्ट्रिय स्वतन्त्र पार्टी (रास्वपा) को समानुपातिक तर्फको उम्मेदवारको प्रारम्भिक सूचीमा समेटिएकी छन् । ‘तिमीलाई हङकङ पुर्‍यायो आइडी काडैले’ जस्ता दर्जनौं चर्चित गीतमार्फत दर्शक–श्रोताको मन जितेकी राईको नाम खोटाङ जिल्लाबाट आदिवासी जनजाति समूहअन्तर्गत सिफारिस गरिएको हो ।

रास्वपाले सार्वजनिक गरेको प्रारम्भिक सर्टलिष्टमा खोटाङबाट राईको मात्रै नाम समावेश हुनुले पनि उनको राजनीतिक प्रवेशलाई अर्थपूर्ण रूपमा हेरिएको छ । सांगीतिक यात्राबाट समाजमा सक्रिय भूमिका निर्वाह गर्दै आएकी राई पछिल्लो समय राजनीतिक क्षेत्रमा पनि योगदान दिने चाहनासहित अघि बढेकी देखिन्छिन् । हाल सांगीतिक कार्यक्रम तथा भेटघाटका सिलसिलामा अमेरिकामा रहेकी राईले आफू रास्वपाको समानुपातिक उम्मेदवारको प्रारम्भिक सूचीमा परेको जानकारी पाएको बताइन् ।

उनले निर्वाचित भएर जनताको पक्षमा काम गर्ने इच्छा रहेको स्पष्ट पार्दै पार्टीका साथीभाइ तथा शुभेच्छुकहरूले राजनीतिमा सक्रिय भएर योगदान गर्न प्रेरित गरेको उल्लेख गरिन् । ‘अहिले म नेपाल बाहिर छु’, राईले सुनाइन्, ‘जनवरी २ मा नेपाल फर्किएपछि पार्टीसँग थप छलफल गर्छु ।’ रास्वपाले प्रारम्भिक सूचीमा परेका उम्मेदवारहरूसँग पुस ५ गते छलफल गर्ने कार्यतालिका बनाए पनि अमेरिकामा रहेकी राई उक्त छलफलमा सहभागी नहुने बताइएको छ । गायन क्षेत्रबाट स्थापित पहिचान बनाएकी सत्यकला राई चलचित्र निर्माता नवल खड्काकी श्रीमती समेत हुन् । सांस्कृतिक क्षेत्रबाट राजनीतिमा प्रवेश गर्ने उनको कदमलाई धेरैले चासोका साथ हेरिरहेका छन् । अब नेपाल फर्किएपछि हुने छलफलले उनको राजनीतिक यात्राको आगामी दिशा तय गर्ने अपेक्षा गरिएको छ ।