काठमाडौं । चार महिनाअघि विभाजन भएका रेशम चौधरी र रञ्जिता श्रेष्ठले नेतृत्व गरेको पार्टीबीच भोलि (शनिबार) एकता हुने भएको छ । शनिबार सिनामंगलस्थित नाउपा नेपाल कार्यालयमा दिउँसो १ बजे पार्टी एकताको घोषणा हुने जनाइएको छ । रेशम जेलमा रहेका बेला रञ्जिताको अध्यक्षतामा २०७८ पुसमा नागरिक उन्मुक्ति पार्टी गठन भएको थियो । पार्टीले स्थानीय तह, प्रदेश र प्रतिनिधि सभामा छोटो समयमै राम्रो नतिजा ल्याएको थियो । तर दम्पतीबीचको विवादका कारण पार्टी केही समय सुस्त बनेको थियो ।

टीकापुरमा भएको पहिलो महाधिवेशनपछि रञ्जितालाई हटाउँदै रेशम अध्यक्ष भएपछि विवाद उत्कर्षमा पुगेको थियो । त्यसको करिब दुई वर्षपछि भदौ २९ गते रेशमले नाउपाबाट अलग भएर कबीर सोबको अध्यक्षतामा नाउपा नेपाल दर्ता गरेका थिए । नाउपा नेपालसँग भोलि एकता गर्ने करिब सबै तयारी पुरा भइसकेको नाउपा अध्यक्ष रञ्जिता श्रेष्ठले बताइन् । उनले सुनाइन्, ‘केही कारणले उहाँहरू पार्टी छाडेर जानु भएको थियो, फेरि मैले प्रयास गरेर मिलाएँ । भोलि एकता गर्ने करिब सबै तयारी पुरा भइसकेको छ ।’ एकताको पछि पार्टीको नाम, झण्डा र चुनाव चिह्न नाउपा नेपालकै प्रयोग गर्ने श्रेष्ठले बताइन् ।