सिन्धुली । सिन्धुलीमा गोली लागेको अवस्थामा एक युवक मृत भेटिएका छन् । गए राति घ्याङलेख गाउँपालिका–१ पिउरीखोला जंगलमा २२ वर्षीय आशमान तामाङ मृत फेला परेको जिल्ला प्रहरी कार्यालय सिन्धुलीका एसपी लालध्वज सुवेदीले जानकारी दिएका छन् । उनका अनुसार मृतकलाई गोली लागेको छ । मृतकको पेटमा चोट लागेको र घटनास्थलमा बन्दुक पनि फेला परेको छ । ‘घटना कसरी भयो भन्ने यकिन भएको छैन । आफै पड्किएको हो वा कसैले हानेको हो भन्ने फरेन्सिक र पोष्टमर्टम रिपोर्ट आएपछि थाहा हुन्छ,’ एसपी सुवेदीले भने । शव पोष्टमर्टमका लागि जिल्ला अस्पताल सिन्धुली पठाइएको छ ।