काठमाडौं । मार्क्सवादी अध्येता तथा इन्जिनियर अशेष घिमिरेलाई नेपाली कम्युनिस्ट पार्टी (नेकपा)ले झापा– १ मा उम्मेदवार बनाउने भएको छ ।

शनिबार पार्टी संयोजक पुष्पकमल दाहाल ‘प्रचण्ड’, सहसंयोजक माधवकुमार नेपाल, नेता झलनाथ खनालसहितका नेताहरूले अशेषलाई टिकट दिएका हुन् ।

४२ वर्षे उनी नेकपाको केन्द्रीय कमिटी सदस्य हुन् । उनले भने, ‘संयोजक–सहसंयोजकसहितका नेताहरूले शुभकामना दिएर टिकट प्रदान गर्नुभएको छ ।’

२०७९ को प्रतिनिधिसभा निर्वाचनमा झापा– १ बाट नेपाली कांग्रेसका उपसभापति विश्वप्रकाश शर्मा विजयी भएका थिए । उनले यसपटक निर्वाचन नलड्ने घोषणा गरिसकेका छन् ।

उनीभन्दा अघि २०७४ को प्रतिनिधिसभा निर्वाचनमा तत्कालीन नेकपा माओवादी केन्द्र (हाल प्रगतिशील लोकतान्त्रिक पार्टी) का नेता राम कार्की निर्वाचित भए । कार्कीभन्दा अघि भने एमाले नेता रविन कोइराला पटकपटक निर्वाचित भएका थिए ।

चुनावी परिणामलाई आधार मान्दा झापा– १ कम्युनिस्ट जनमत भएको क्षेत्र हो । यही क्षेत्रबाट नयाँ पुस्ताका मार्क्सवादका गहिरो अध्येताको पहिचान बनाएका अशेषलाई नेकपाले उम्मेदवार बनाएको हो ।

शनिबार नै झापा–५ मा नेकपाले पूर्वविद्यार्थी नेता तथा नेकपा केन्द्रीय सदस्य रञ्‍जित तामाङलाई उम्मेदवार बनाएको छ ।