काठमाण्डाैं। सर्वोच्च अदालतले काठमाडौँ उपत्यकाका खोला–नदी किनारमा थप २० मिटर क्षेत्र खाली राख्नुपर्ने सम्बन्धी अघिल्लो फैसला उल्ट्याएको छ।

आइतबार सर्वोच्च अदालतका न्यायाधीशहरू सुनिलकुमार पोखरेल, बालकृष्ण ढकाल र नृपध्वज निरौलाको पूर्ण इजलासले संयुक्त इजलासबाट यसअघि गरिएको फैसला बदर गरेको हो।

पूर्ण इजलासले फैसलामा उल्लेख गरेको छ, ‘उक्त फैसला कानून र न्यायको रोहमा मिलेको नदेखिँदा संयुक्त इजलासको मिति २०८०/०९/०३ को फैसला सो हदसम्म उल्टी हुने ठहर गरिन्छ।’

यसअघि सर्वोच्च अदालतको संयुक्त इजलासले मन्त्रिपरिषद्बाट तोकिएको मापदण्डभन्दा बाहेक नदी तथा खोलाको दायाँ बायाँ थप २० मिटर क्षेत्र खाली राख्नुपर्ने निर्णय गरेको थियो।

तर उक्त फैसलाविरुद्ध पुनरावलोकनको माग गर्दै सर्वोच्च अदालतमा रिट दायर गरिएको थियो। सोही रिटमाथि सुनुवाइ गर्दै पूर्ण इजलासले थप २० मिटर खाली राख्नुपर्ने व्यवस्था लागू नहुने निर्णय गरेको हो।