काठमाडौं । राष्ट्रिय लिग फुटबलमा न्युरोड टिम (एनआरटी)ले लगातार चौथो जित निकालेको छ । बिहीबार संकटा क्लबविरुद्ध एनआरटीले ३–१ को जित निकाल्यो ।

सातदोबाटोस्थित एन्फा कम्प्लेक्स मैदानमा भएको खेलमा संकटाको जितमा कप्तान कृतिशरत्न छुन्जु र टिमोथी चिमेरी ओकेरेकेले १–१ गोल गरे भने १ गोल आत्मघाती उपहारस्वरुप प्राप्त भयो । संकटका कृष्णबहादुर आलेले १ गोल फर्काए ।

एनआरटीलाई खेलको ११ औँ मिनेटमा कृतिशले गोल गर्दै अग्रता दिलाएका थिए । कृतिशको गोलले दबाबमा परेको संकटाका टाये ड्यानियल बडारुले दोहोरो पहेंलो कार्ड व्यहोर्दै २४ औँ मिनेटमै मैदान छाडेपछि संकटालाई झनै संकट आइप¥यो । खेलाडी १० जनामा सीमित भयो ।

यस्तोमा वेन्डपाङ्गा गिल्बर्ट बिल्गोबाट ५१ औँ मिनेटमा आत्मघाती गोल हुन पुग्दा एनआरटीको अग्रता दोब्बर भयो । ५ मिनेटपछि कृष्णले संकटाका लागि गोल फर्काए ।

तर, ओकेरेकेले ६७ औँ मिनेटमा एनआरटीका लागि तेस्रो गोल गरे । ८६ औँ मिनेटमा ओकेरेकेले नै दोहोरो पहेंलो कार्ड व्यहोर्दै मैदान छाडेपछि एनआरटी पनि १० खेलाडीमा समेटिएको थियो ।

जितसँगै एनआरटीले ५ खेलमा १२ अंक जोडेको छ । पराजित संकटाको समान खेलबाट ५ अंक छ ।