काठमाडौं । राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह (बालेन)को चुनावी अभियानका क्रममा अछाम पुगेका पत्रकार दिनेश सिटौलाको निधन भएको छ ।

उनी शुक्रबार बालेन सहभागी कार्यक्रममा बेहोस भएका थिए । ४५ वर्षीय सिटौलाको उपचारको क्रममा आइतबार निधन भएको ग्राण्डी इन्टरनेशनल अस्पताल काठमाडौंले जनाएको छ ।

प्रेस विज्ञप्तिअनुसार सिटौलालाई गम्भीर अवस्थामा अस्पताल ल्याइएको थियो । गम्भीर सब–एराक्नोइड हेमरेजको आशंकामा सिटौलालाई क्रिटिकल केयर तथा न्युरोसर्जरी टोलीको संयुक्त निगरानीमा आईसीयूमा भर्ना गरिएको थियो ।

प्रारम्भिक परीक्षणमा मस्तिष्कमा रक्तस्राव देखिएपछि थप ४८ घण्टासम्म कडा निगरानीमा उपचार गरिएको अस्पतालले जनाएको छ ।

आईसीयू उपचारका क्रममा उनलाई डायबेटिस इन्सिपिडससम्बन्धी समस्या समेत देखिएको र मापदण्डअनुसार उपचार गरिएको विज्ञप्तिमा उल्लेख छ ।

यद्यपि, ४८ घण्टापछि पनि उनको न्युरोलोजिकल अवस्थामा कुनै सुधार नआएको र मस्तिष्कको कार्यक्षमता पुनः प्राप्त हुने संकेत नदेखिएको अस्पतालको भनाइ छ ।

यसपछि चिकित्सकीय प्रोटोकलअनुसार गरिएको ‘एपनिया टेस्ट’ पोजिटिभ आएपछि सिटौलाको मस्तिष्क मृत्युको पुष्टि गरिएको र सोही आधारमा शनिबार राति १२ः४५ बजे उनको निधन भएको जानकारी अस्पतालले दिएको हो ।

ग्राण्डे इन्टरनेशनल अस्पतालले विज्ञप्तिमार्फत सिटौलाको निधनप्रति गहिरो दुःख व्यक्त गर्दै शोकसन्तप्त परिवारप्रति समवेदना प्रकट गरेको छ । साथै, अस्पतालले बिरामीको हेरचाहमा सबै सम्भावित चिकित्सकीय प्रयास गरिएको स्पष्ट पारेको छ ।

तर, कतिपयले भने सिटौला अछाममा गम्भीर बिरामी परेको घटनालाई शंकाको दृष्टिले हेरेका छन् । सिटौलालाई ग्रान्डीमा उपचार गराइरहँदा त्यहाँ बालेन पनि पुगेका थिए । त्यसबेला उनले दिएको अभिव्यक्तिलाई लिएर परिवारका सदस्यहरूले असन्तुष्टि जनाएका थिए ।