काठमाडौं । राष्ट्रिय युवा संघ नेपालका अध्यक्ष माहाराज गुरुङले नेकपा एमालेका उम्मेदवारहरू निर्वाचित भए मात्र देशको राष्ट्रियता सुरक्षित रहने दाबी गरेका छन्।

उनले सामाजिक सञ्जालको लोकप्रियताका आधारमा बनेका नयाँ दलहरू राष्ट्रियताका लागि खतरा बन्न सक्ने चेतावनी दिएका छन्।

अध्यक्ष गुरुङका अनुसार पछिल्लो समय सामाजिक सञ्जालमा चर्चित भएका केही व्यक्तिहरू नयाँ दलको नाममा उम्मेदवार बनेको देखिएको छ, जसले गम्भीर प्रश्न खडा गरेको छ।

“आज सामाजिक सञ्जालमा कोही मान्छे लोकप्रिय भएको आधारमा नयाँ पार्टीको नाममा उम्मेदवार भइरहेका छन्,” उनले भने, “हामीले यो देखिरहेका छौँ, पढिरहेका छौँ।”

उनले विगतमा देश जलाउने गतिविधिमा संलग्न व्यक्तिहरू अहिले नयाँ दलको आवरणमा संसदीय राजनीतिमा प्रवेश गर्न खोजेको आरोप लगाए। “हिजो सिंहदरबार जलाउने, नेपालको झण्डा बोकेर हात ठाडो पार्नेहरू आज नयाँ दलका उम्मेदवार बनेका छन्,” गुरुङले भने, “आज संसद् जलाएका मान्छेहरू नयाँ दलका उम्मेदवार भइरहेका छन्।”

अध्यक्ष गुरुङले अझ गम्भीर आरोप लगाउँदै सहकारी ठगीमा फौजदारी अभियोग लागेका व्यक्तिहरू समेत नयाँ दलका नाममा उम्मेदवार बनेको दाबी गरे। “आज सहकारी ठगीमा फौजदारी अभियोग लागेका मान्छेहरू पनि नयाँ दलको नाममा उम्मेदवार भइरहेका छन्,” उनले भने।

उनका अनुसार यस्ता प्रवृत्तिले लोकतन्त्र र राष्ट्रिय हितमाथि गम्भीर जोखिम निम्त्याउने भएकाले एमालेका उम्मेदवारहरूलाई जिताउनु देश र राष्ट्रियताको रक्षा गर्ने लडाइँ भएको दाबी गरे। युवा संघले यही आधारमा निर्वाचनलाई निर्णायक राजनीतिक संघर्षका रूपमा लिएको उनको भनाइ छ।