काठमाडौं । अमेरिकी सैन्य कारबाहीमार्फत सत्ताच्युत गरी न्यूयोर्क लगिएका भेनेजुएलाका पूर्वराष्ट्रपति निकोलस मादुरोको रिहाइको माग गर्दै राजधानी कराकसमा हजारौँ समर्थक सडकमा उत्रिएका छन् ।

मादुरोलाई पक्राउ गरिएको ठीक एक महिना पुगेको दिन ‘भेनेजुएलालाई निकोलस चाहिन्छ’ भन्ने नारासहित भएको प्रदर्शनले देशको राजनीतिक तनाव थप चर्काएको छ ।

लागूऔषध ओसारपसारको अभियोगमा अमेरिकाले नाटकीय ढंगले मादुरोलाई नियन्त्रणमा लिएपछि सत्तामा पुगेकी अन्तरिम राष्ट्रपति डेल्सी रोड्रिग्वेज दोहोरो दबाबमा परेकी छन् ।

एकातिर वासिङ्टनको समर्थन जोगाइराख्नुपर्ने र अर्कोतिर आफ्नै सरकारभित्र रहेका मादुरोका कट्टर समर्थक तथा जनभावनालाई सम्बोधन गर्नुपर्ने चुनौती उनीसामु छ ।

सरकारी आह्वानमै आयोजित प्रदर्शनमा ठूलो संख्यामा सार्वजनिक क्षेत्रका कर्मचारी सहभागी थिए । प्रदर्शनकारीहरूले मादुरो र उनकी पत्नी सिलिया फ्लोरेसका तस्बिर बोकेका थिए । फ्लोरेसलाई पनि अमेरिकाले पक्राउ गरेको जनाएको छ ।

ट्रकमा बजिरहेको क्रान्तिकारी संगीतसहित सयौँ मिटर लामो जुलुसको नेतृत्व मादुरोका छोरा तथा नेशनल एसेम्बली सदस्य निकोलस ‘निकोलासितो’ मादुरो गुएराले गरेका थिए । उनले भीडलाई सम्बोधन गर्दै भने, “यी जनता अमेरिकी होइनन् । हामी साम्राज्यवादविरोधी चेतनाले एकताबद्ध छौँ ।”

रातो पोसाक, भेनेजुएलाको झण्डा र ह्युगो चाभेजकालीन समाजवादी आन्दोलनका प्रतीकले कराकसको सडक भरिएको थियो । ५८ वर्षीय नगरपालिका कर्मचारी जोसे परडोमोले अन्तरिम राष्ट्रपति रोड्रिग्वेजका पछिल्ला निर्णयप्रति समर्थन जनाए पनि अन्ततः मादुरोलाई रिहा गर्नुपर्ने बताए ।

रोड्रिग्वेज विगतमा मादुरोकी उपराष्ट्रपति तथा नजिककी सहयोगी थिइन् । तर सत्ता सम्हालेपछि उनले अमेरिकी दबाबअनुसार राजनीतिक बन्दी रिहा गर्ने, राष्ट्रियकरण गरिएका हाइड्रोकार्बन उद्योग निजी लगानीका लागि खुला गर्ने जस्ता निर्णय लिएकी छन् । यससँगै सन् २०१९ यता अवरुद्ध कूटनीतिक सम्बन्ध पुनःस्थापित भएको छ ।

अमेरिकी राष्ट्रपति डोनाल्ड ट्रम्पले भेनेजुएलाको विशाल तेल भण्डारमा अमेरिकी पहुँच सुनिश्चित हुने नीतिमा सहमत भए रोड्रिग्वेजसँग सहकार्य गर्न तयार रहेको संकेत दिएका छन् ।

यसैबीच, मंगलबार नै राजधानी कराकसमा सयौँ विश्वविद्यालयका विद्यार्थी र राजनीतिक बन्दीका आफन्तहरूले अलग प्रदर्शन गर्दै रोड्रिग्वेजले घोषणा गरेको ‘आममाफी कानुन’ तत्काल पारित गर्न माग गरेका छन् । यो विधेयक अझै संसदमा दर्ता हुन बाँकी छ, जसको नेतृत्व अन्तरिम राष्ट्रपतिका भाइ जोर्गे रोड्रिग्वेजले गरिरहेका छन् ।

विपक्षी सांसद स्टालिन गोन्जालेजका अनुसार उक्त कानुनमाथि संसदमा बिहीबार पहिलो छलफल हुने अपेक्षा गरिएको छ ।

अन्तर्राष्ट्रिय सञ्चारमाध्यमहरूका अनुसार कराकसमा बढ्दो प्रदर्शनले अन्तरिम सरकारको स्थायित्व र अमेरिकासँगको सम्बन्ध दुवैलाई निर्णायक मोडतर्फ धकेल्दै लगेको संकेत देखिएको छ ।