काठमाडौं । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले हजार पटक सोचेर मात्रै मतदान गर्न मतदाताहरूलाई आग्रह गरेका छन् ।

उनले मत दिनु छोरी दिनुभन्दा ठूलो कुरा भएको बताए । उनले छोरी दिनुअघि धेरैपटक विचार गर्ने गरेको बताए ।

‘भोट दिने कुरा त छोरी दिने भन्दा ठूलो कुरा हो । छोरी दिन हामी कतिचोटी विचार गर्छौँ ? एउटा कुटुम्ब आउने बित्तिकै छोरी दिन्छौँ त ?’ उनले भने, ‘तपाईंहरूलाई भन्छु, मत दिनुअघि हजारपटक सोच्नहोस् ।’

यो देश धर्मनिरपेक्ष बन्नुमा नेताको मात्रै दोष नभएको भन्दै मतदाताहरू पनि जिम्मेवार रहेको उनको भनाइ छ । मतदाताले मत नदिए देश धर्म निरपेक्ष नहुने दाबी गरे ।

‘यो देशलाई धर्म निरपेक्ष बनाउनुमा, यो देशलाई संविधानमै धर्म निरपेक्ष शब्द घुसाउनुमा नेताको मात्रै दोष छैन । त्यो नेतालाई भोट दिने हाम्रो हातको पनि दोष छ,’ उनले भने, ‘धर्म निरपेक्ष राष्ट्र बनाउँछु भनेर घोषणापत्रमा लेखेर हिँड्नेहरूलाई भोट नदिएको भए देश धर्म निरपेक्ष हुँदैन थियो ।’

नेपाल धर्म निरपेक्ष हुनुमा जन्मकर्मसँगै धर्मको महलमा हिन्दु लेख्नेहरूको पनि गल्ती भएको बताए ।