काठमाडौं । पूर्वमन्त्री समेत रहेका नेकपा एमालेका सचिव महेश बस्नेतलाई मतदाताहरूले ‘विकासवादी’ उम्मेदवारको रूपमा लिएको पाइएको छ ।

बस्नेतले विगतमा भक्तपुर–२ को भौतिक पूर्वाधार क्षेत्रमा राम्रो गरेको भन्दै कतिपय मतदाताहरूले उनको प्रशंसा गरेको पाइएको हो ।

चुनावी अभियानको क्रममा गाउँ टोलमा पुुग्दा बस्नेतको गलाभरी खादा माला देखिने गरेको छ । उनलाई हार्दिकतापूर्ण स्वागत गरेका मतदाताहरूले यसपटक विजयी गराउने प्रतिज्ञा गरेको पनि देखिएको हो ।

अघिल्लो पटक भने बस्नेत कांग्रेस नेता दुर्लभ थापासँग पराजित भएका थिए । त्यसअघिका निर्वाचनहरूमा पटकपटक निर्वाचित बस्नेत एकपटक उद्योगमन्त्री भए ।

एमाले अध्यक्ष केपी शर्मा ओलीका अत्यन्त विश्वास पात्र बस्नेतले विगतमा थुुप्रै योजना भक्तपुर–२ मा लगेका थिए, जसले त्यस क्षेत्रको भौतिक पूर्वाधारको विकास सम्भव भयो ।

यसपटक उनी आफूलाई भक्तपुरको विकास र समृद्धिको विश्वासिलो नेतृत्वको रूपमा प्रस्तुत गर्दै मत मागिरहेका छन् । चुनाव भने अब दुई सातामा हुँदैछ ।