काठमाडौं । नेपाली कांग्रेसका सभापति गगन थापाले देशको विकास र लोकतन्त्रको रक्षाका लागि उत्तेजना नभई सुझबुझपूर्ण सहकार्य र बलियो संस्थागत संरचना आवश्यक रहेको बताएका छन् ।

काठमाडौंमा आयोजित एक कार्यक्रमलाई बुधबार सम्बोधन गर्दै उनले विश्वव्यापी रूपमा बढ्दै गएको ‘पपुलिजम’को लहरबाट नेपालको लोकतन्त्रलाई जोगाउन सबै पक्ष गम्भीर हुनुपर्नेमा जोड दिए ।

सभापति थापाले विश्वका परिपक्व लोकतान्त्रिक देशहरू समेत अहिले ‘पपुलिजम’को सिकार भइरहेको भन्दै चिन्ता व्यक्त गरे ।

उनले भने, ‘हेर्दाहेर्दै पपुलिजमको एउटा ठूलो लहर आएको छ । यसको आक्रमणबाट नेपालको लोकतन्त्रलाई हामीले जोगाउनसक्छौँ कि सक्दैनौँ भन्ने गम्भीर प्रश्न खडा भएको छ ।’

उनले क्षणिक लोकप्रियताका लागि गरिने राजनीतिले लोकतन्त्रको मर्मलाई कमजोर बनाउन सक्ने भन्दै सचेत रहन आग्रह गरे ।

राज्यका संस्थाहरू बलियो नभए राष्ट्र असफल हुनेतर्फ संकेत गर्दै सभापति थापाले ‘ह्वाई नेसन्स फेल’ पुस्तकको सन्दर्भ उल्लेख गरे । उनले संस्थाहरू कमजोर भएको अवस्थामा पपुलिजमले अख्तियारी पाएमा त्यसको भार देशले थाम्न नसक्ने बताए ।

‘लोकतन्त्रलाई दिगो बनाउन र मुलुकलाई सही दिशामा लैजान बलिया संस्थाहरूको निर्माण अपरिहार्य छ,’ उनले भने ।

देशको समृद्धिका लागि एकल प्रयास मात्र पर्याप्त नहुने भन्दै उनले ‘टिम नेपाल’को अवधारणा अघि सारे । उनका अनुसार टिम नेपालभित्र ७ वटा प्रदेश, ७ सय ५३ वटा स्थानीय तह, संसदमा रहेका सबै राजनीतिक दलहरू, निजी क्षेत्र र आम नागरिक समेटिनुपर्छ । सबैको साझा प्रयास र अपनत्वले मात्र सरकार र व्यवस्थाले डेलिभरी दिन सक्ने उनको भनाइ थियो ।

यस्तै, कांग्रेसको ऐतिहासिक विरासत र वर्तमान सान्दर्भिकताबारे बोल्दै सभापति थापाले कांग्रेस पुरानो पार्टी भएर पनि सधैँ नवीन रहने जिकिर गरे ।

उनले भने, ‘नेपाली कांग्रेस सबैभन्दा पुरानो पार्टी भएकोमा गौरव गर्छ तर यसले सडकमा आएका नौजवानहरूको आवाजलाई पनि उत्तिकै सुन्छ । त्यसैले यो सबैभन्दा पुरानो पार्टी पनि हो र समयको मागअनुसार चल्ने सबैभन्दा नयाँ पार्टी पनि यही हो ।’

उनले देशको मुहार फेर्न रिस र उत्तेजना काम नलाग्ने बताउँदै राष्ट्रिय एकता र राजनीतिक सहकार्यमा जोड दिए ।