काठमाडौं । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले प्रतिनिधिसभा निर्वाचनको घोषणापत्र सार्वजनिक गर्दै चार गम्भीर प्रश्न गरेका छन् ।

सिंगो समाज प्रश्नैप्रश्नको घेरामा रहेको र आम मतदाताको स्थापित दलहरूमाथि प्रश्न रहेको भन्दै उनले जेन–जी विद्रोह र त्यहाँ भएका घुसपैठदेखि प्रतिनिधिसभा विघटनसम्मका प्रश्न गरेका छन् ।

पहिलो– भदौ २३ अघि देश बनिरहेको थियो कि बिग्रिँदै थियो ? कि देश बिग्रिएको काल्पनिक भाष्य खडा गरेर आक्रोश विस्तार गरिँदै थियो ?

दोस्रो– भदौ २३ को प्रदर्शनमा कसले घुसपैठ गर्‍यो ? शान्तिपूर्ण कार्यक्रम सकियो भन्दै घर फर्कन लागेका युवालाई निषेधित क्षेत्रतर्फ कसले र किन धकेल्यो ?

तेस्रो– भदौ २३ र २४ का घटनाहरू स्वतस्फूर्त थिए कि योजनाबद्ध ? निजी सम्पत्ति, व्यवसाय र साधारण नागरिकलाई किन लक्ष्य बनाइयो ? आफ्ना कर्तव्य पूरा गरिरहेका सुरक्षाकर्मीमाथि किन आक्रमण गरियो ?

चौथो– सरकार संविधान तथा व्यवस्थाका सन्दर्भमा जेन–जी प्रदर्शनकारीका कुनै माग थिएनन् । हुँदै नभएका माग पूरा गरेझैँ प्रणालीमाथि नै धावा बोल्नेगरी प्रतिनिधिसभाको विघटन किन गरियो ?

ओलीले देशको राजनीति यतिखेर देश भत्काउने र बनाउने दुई सोचबीच संघर्ष भइरहेको पनि बताए ।