काठमाडौं । नेकपा एमालेले प्रतिनिधिसभा निर्वाचनका लागि सार्वजनिक गरेको घोषणापत्रमा अर्थतन्त्र, रोजगारी, डिजिटल रूपान्तरण, शिक्षा, महिला सशक्तिकरण, पूर्वाधार, ऊर्जा, स्वास्थ्य, कृषि र पुनर्निर्माणलाई केन्द्रमा राख्दै ‘युगान्तकारी महत्वका’ योजनाहरू अघि सारेको छ ।

घोषणापत्र सार्वजनिक गर्दै पार्टी अध्यक्ष केपी शर्मा ओलीले निर्धारित समय सीमाभित्र प्रतिबद्धता कार्यान्वयन गरिने बताएका छन् ।

एमालेले पाँच वर्षभित्र देशको अर्थतन्त्रको आकार १०० खर्ब रुपैयाँ र १० वर्षभित्र २०० खर्ब रुपैयाँ पुर्‍याउने लक्ष्य लिएको छ । प्रतिव्यक्ति आय तीन हजार अमेरिकी डलर पुर्‍याउने प्रतिबद्धता पनि गरेको छ ।

स्वदेशमै वार्षिक ५ लाख रोजगारी सिर्जना गर्ने योजना अघि सारिएको छ । साथै श्रमिकको मासिक न्यूनतम पारिश्रमिक २५ हजार रुपैयाँ पुर्‍याउने उल्लेख छ ।

१८ देखि २८ वर्षका युवालाई मासिक १० जीबी इन्टरनेट डाटा निःशुल्क उपलब्ध गराइने तथा स्टार्टअप र उद्यमी युवालाई अन्तर्राष्ट्रिय कारोबारका लागि १० हजार अमेरिकी डलर बराबरको कार्ड उपलब्ध गराइने एमालेको योजना छ ।

प्राविधिक उच्च शिक्षा अध्ययन गर्ने विद्यार्थीलाई २० लाख रुपैयाँसम्म निर्व्याजी ऋण उपलब्ध गराउने जनाएको छ ।

यी हुन् १० युगान्तकारी महत्वका योजना

१.अर्थतन्त्रमा विशाल छलाङ
–५ वर्षभित्र देशको अर्थतन्त्रको आकार १०० खर्ब
–१० वर्षमा २०० खर्ब पुर्‍याउने
–प्रतिव्यक्ति आय ३,००० अमेरिकी डलर पुर्‍याउने
२. रोजगारी र न्यूनतम पारिश्रमिक
–स्वदेशमै वार्षिक ५ लाख रोजगारी सिर्जना गर्ने
–श्रमिकहरूको मासिक न्यूनतम पारिश्रमिक २५ हजार पुर्‍याउने
३. डिजिटल क्रान्ति
–१८ देखि २८ वर्षका युवालाई मासिक १० जीबी इन्टरनेट डाटा निःशुल्क दिने
–स्टार्टअप/उद्यमी युवालाई अन्तर्राष्ट्रिय कारोबार गर्न १० हजार डलर बराबरको कार्ड उपलब्ध गराउने।
४. शिक्षामा लगानी
–प्राविधिक उच्च शिक्षा पढ्ने विद्यार्थीलाई २० लाखसम्मको निव्र्याजी ऋण उपलब्ध गराउने
–पढ्दै कमाउँदै नीति लागू गर्ने।
५. महिला सशक्तिकरण प्याकेज
–महिला उद्यमीलाई २० लाखसम्म निव्र्याजी ऋण
– सुत्केरी पोषण भत्ता २०,०००
–५ लाखको निःशुल्क जीवन बीमा गर्ने
६. पूर्वाधार विकास
–५ वर्षभित्र पूर्व–पश्चिम विद्युतीय रेलमार्ग
–काठमाडौं–तराई द्रुतमार्गको निर्माण कार्य सम्पन्न गर्ने।
७. ऊर्जा र निर्यात
– विद्युत उत्पादन र प्रतिव्यक्ति विद्युत खपत दोब्बर बनाउने
–नेपाललाई दक्षिण एसियाकै स्वच्छ ऊर्जा निर्यातक हब बनाउने
८. स्वास्थ्य र सामाजिक सुरक्षा
–महिला स्वास्थ्य स्वयंसेविकाको भत्ता वृद्धि गरेर वार्षिक २०,००० पुर्‍याउने
–सबै नागरिकलाई गुणस्तरीय स्वास्थ्य बीमा र सामाजिक सुरक्षाको दायरामा ल्याउने।
९. कृषि र आत्मनिर्भरता
– २ वर्षभित्र सबै घरमा स्वच्छ खानेपानी पुर्‍याउने
– खाद्यन्नमा देशलाई आत्मनिर्भर बनाउँदै निर्यात दोब्बर गर्ने।
१०. पुनर्निर्माण संकल्प
–जेनजी आन्दोलनमा क्षति भएका राष्ट्रिय संरचनाहरूको १ वर्षभित्रै पुनर्निर्माण सम्पन्न गर्ने