काठमाडौं । राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह (बालेन)ले कर्णालीको वास्तविक गरिबी र पीडा बुझ्ने राजनीतिक शक्ति रास्वपालाई बनाउने दाबी गरेका छन्।

बिहीबार सुर्खेतमा आयोजित चुनावी वाचापत्र सार्वजनिक कार्यक्रममा बोल्दै उनले कर्णालीलाई ‘शिवभूमि’को संज्ञा दिँदै त्यहाँको विकास र सम्मानलाई प्राथमिकतामा राख्ने प्रतिबद्धता व्यक्त गरे।

‘कर्णालीको दु:ख र गरिबीलाई बेच्ने नेता धेरै आए, तर बुझ्ने नेता आएनन्। त्यो बुझ्ने पार्टी बन्न चाहन्छ राष्ट्रिय स्वतन्त्र पार्टी,’ बालेनले भने।

उनले कर्णालीको उत्पादन र सम्भावनालाई राजनीतिक भाषणमा सीमित नराखी व्यवहारमा उतार्नुपर्नेमा जोड दिए। ‘आजको दिनमा सुनजस्तो मानिने डोल्पाको यार्सागुम्बा विश्वभरी पुग्न सक्छ, तर कर्णालीको स्याउ र मार्सी चामल चितवन र झापा पुग्न सक्दैन। यहाँको उत्पादनलाई देशभरी पुर्‍याउने पार्टी बन्न चाहन्छ रास्वपा,’ उनले स्पष्ट पारे।

बालेनले कर्णालीको ऐतिहासिक र सांस्कृतिक महत्त्वसमेत स्मरण गरे। ‘शिव भगवानको पाउमा आएर वाचापत्र घोषणा गर्न पाउँदा खुसी छौँ,‘ उनले भने, ‘यो भूमि सम्भावनाले भरिएको छ, तर नीति र नेतृत्वको अभावले पछि परेको छ।’

उनका अनुसार रास्वपाले कर्णालीलाई सहानुभूतिको विषय होइन, विकासको केन्द्रका रूपमा हेर्नेछ।