काठमाडौं । नेकपा एमालेका अध्यक्ष तथा झापा-५ का उम्मेदवार केपी शर्मा ‌ओलीले जिल्लादेखि देशसम्मको विकासको जिम्मा आफूले लिने बताएका छन्।

काेशीमा ‘नेशनल भोलेन्टियर्स फोर्स’ गठनपछि बाेल्दै उनले झापा, कोशी प्रदेश र समग्र देशको विकासप्रति आफू प्रतिबद्ध रहेको बताएका हुन्।

‘यस जिल्ला (झापा)को विकासको जिम्मा मेरो हो, तपाईंहरू ढुक्क हुनुहोस्। यो प्रदेश (कोशी)को विकासको जिम्मा मेरो हो, तपाईंहरू ढुक्क हुनुहोस्। यो देशको विकासको जिम्मा मेरो हो, तपाईंहरू ढुक्क हुनुहोस्,’ साेमबार उनले भने।

ओलीले देशका सबै सदरमुकाम सडक सञ्जालसँग जोडिएको दाबी गर्दै हुम्ला जिल्ला पनि आफ्नै पालामा जोडिएको बताए। ‘देशको सबै सदरमुकाममा मोटरबाटो जोडिएको छ। हुम्ला जिल्लाको सदरमुकाम जोड्न बाँकी थियो, अहिले हुम्लाको सदरमुकाम पनि जोडिएको छ,’ उनले उल्लेख गरे।

कोशी प्रदेशकाे पहाडी जिल्ला ताप्लेजुङकाे ओलाङचुङगोलासम्मै (चीन सीमा) जोड्ने सडक कालोपत्रे भइरहेको जानकारी दिँदै उनले भने, ‘यस प्रदेशको ताप्लेजुङ हुँदै ओलाङचुङगोलासम्म सीमा जोड्ने सडक कालोपत्रे हुँदै छ। हामीले नै ट्र्याक खोलेका हौँ। हाम्रो काम विकास गर्ने हो, हरेक क्षेत्रमा।’

उनले कृषिमा आधुनिकीकरणको प्रक्रिया अघि बढाइएको, २०८५ सालसम्म धौवादी फलाम खानी सञ्चालनमा ल्याइने तथा मिथेन ग्यास उत्खननबाट ठूलो आम्दानी हुने दाबी पनि गरे। ‘२०८५ सम्म धौवादी फलाम खानी सुरु गर्दैछौँ। मिथेन ग्यास एक खर्ब १२ अर्ब उत्खनन गर्दैछौँ। ठूलो आम्दानी हुनेछ देशलाई,’ उनले भने।

ओलीले अराजक गतिविधिबाट देशमा शान्ति स्थापना नहुने टिप्पणी गरे। ‘आतंक मच्चाउनेहरूले देशमा शान्ति स्थापना गर्न सक्दैनन्। आगो लगाउने, जलाउनु फरक कुरा हो,’ उनले भने।

उनले मतदातालाई भ्रममा नपर्न आग्रह गर्दै नेकपा एमाले विकास र स्थायित्वको पक्षमा रहेको दाबी गरे। ‘कोही पनि भ्रममा नपरौँ, नेकपा एमाले देश बनाउने पार्टी हो। एमाले बनेका भत्काउने होइन, एमालेले बनाउँछ,’ उनले भने, ‘जनताको कमजोर भएको मनोबल सुदृढ बनाउँछ।’

देशव्यापी रूपमा एमालेको विजय आवश्यक रहेको उल्लेख गर्दै उनले भने, ‘नेपाल राष्ट्रका लागि, नेपाली जनताका लागि, शान्ति सुव्यवस्थाका लागि नेकपा एमालेलाई विजयी बनाउनु आवश्यक छ। नेकपा एमालेको सूर्य चिह्न कसैले बिर्सिनै नसक्ने छ।’