‘पछिल्लोपटक एन्फा नेतृत्वको पहलमा मेरो उपचारमा सम्पूर्ण व्यवस्थापन र सहयोग भएको थियो । त्यसबेला आर्थिक र मानसिक रुपमा मलाई कुनै समस्या थिएन, जसकारण मैले समयमा पुनरागमन गर्दै मैदान फर्कन सकें,’ उनले फेसबुकमा लामाे स्टाटस लेख्दै गुनासाे गरिन्, ‘तर, यसपटक एन्फा नेतृत्वबाट वाचा गरेको सहयोग पनि पाइएन । चोट लागेको ३ सातापछिको लागि क्लबको पहलमा शल्यक्रिया मिति तोकिएको भए पनि एन्फाले आफ्नो तर्फबाट प्रयास गर्ने बतायो । तर सो अनुसार एन्फाबाट प्रक्रिया अघि बढेन । मैले पटक पटक प्रयास गर्दापनि वहाँहरुलाई सम्पर्क गर्न कठिन भयो । अघिल्लो साता एन्फा अध्यक्ष आफैंले मेरो उपचारमा एन्फाबाट प्रशासनिक सहयोग गर्न नसकिने जानकारी दिनुभयो ।’

उनले क्लबले आफूलाई न्युजिल्यान्डकै स्थानीय अस्पतालमा उपचार गर्न तयार रहेको बताइरहेको उल्लेख गरेकी छन् ।

तर चोट गम्भीर रहेको र पछिल्लो पटक कतारको अस्पेटारमा गरिएको उपचार उच्चस्तरको रहेकाले पुन: सोहि अस्पतालमा उपचार गराउने इच्छा राखेको बताइन् ।

क्लबले बीमाबाट प्राप्त रकम निकासा गरिदिने भएको छ । यद्यपि, उक्त रकम शल्यक्रिया र ७-८ महिना पुन:स्थापनाका लागि अपुग हुने भएकाले आम समर्थकमाझ सहयोग माग्नु परेकाे बताइन् ।