काठमाडौं । नेपाल निर्माण व्यवसायी महासङ्घले राष्ट्रिय स्वतन्त्र पार्टीका वरिष्ठ नेता बालेन शाहले दिएको ‘रुखमा बाँधेर भए पनि बाटो बनाउनुपर्छ’ भन्ने अभिव्यक्तिप्रति आपत्ति जनाएको छ।

महासङ्घले उक्त अभिव्यक्ति अमर्यादित, उत्तेजक र निर्माण व्यवसायीहरूको मनोबल गिराउने खालको रहेको टिप्पणी गर्दै सार्वजनिक रूपमा माफी माग्न माग गरेको छ।

फागुन ६ गते धनगढीमा आयोजित चुनावी सभामा सम्बोधन गर्दै शाहले निर्धारित समयमै सडक निर्माण हुन नसकेको उल्लेख गर्दै ‘दुई वर्षमा बन्ने बाटो बीस वर्षमा पनि बन्दैन, डेढ वर्षमा बन्नुपर्ने हाम्रो एजेन्डा हो, रुखमा बाँधेर हुन्छ कि, बाटोमा सुताएर हुन्छ कि, खोरमा जाकेर हुन्छ कि बाटो बन्नुपर्छ’ भन्ने अभिव्यक्ति दिएका थिए।

महासङ्घले उक्त धारणा निर्वाचन आचारसंहिताविपरीत र सस्तो लोकप्रियताका लागि व्यक्त गरिएको आरोप लगाएको छ। महासङ्घद्वारा आयोजित पत्रकार सम्मेलनमा देशभरका करिब ३० हजारभन्दा बढी निर्माण व्यवसायीको प्रतिनिधित्व गर्ने सङ्गठनमाथि यस प्रकारको सार्वजनिक टिप्पणी आउनु दुःखद भएको उल्लेख गरिएको छ।

महासङ्घका अनुसार भौतिक पूर्वाधार विकासमा निर्माण व्यवसायीहरूको महत्वपूर्ण योगदान रहँदै आएको भए पनि समय–समयमा विभिन्न व्यक्तिबाट गरिने आपत्तिजनक अभिव्यक्तिले व्यवसायीहरूको तेजोवध हुने गरेको छ।

निर्माण कार्यमा ढिलाइ हुनुका पछाडि ऐन–कानुनको जटिलता, स्रोत सुनिश्चितताको अभाव, न्यून बजेट विनियोजन, त्रुटिपूर्ण डिजाइन तथा नीतिगत समस्याहरू मुख्य कारण रहेको महासङ्घको दाबी छ।

वि.सं. २०७३-७४ पछि करिब १९ खर्ब रुपैयाँ बराबरका झण्डै एक लाख आयोजना स्वीकृत भए पनि सरकारको अव्यवहारिक नीति र स्रोत अभावका कारण ३० हजारभन्दा बढी आयोजना अलपत्र अवस्थामा रहेको महासङ्घले जनाएको छ।