काठमाडौं। न्युजिल्याण्डमा रहेकी फुटबलर साबित्रा भण्डारी ‘साम्बा’ को उपचारका लागि देशविदेशमा रहेका नेपालीहरूले सहयोग गरिरहेका छन् । सोमबार सामाजिक सञ्जालमार्फत सहयोगको अपिल गरेपछि उनलाई देशभित्र र देशबाहिर रहेका नेपालीहरूले सहयोग गरिरहेका छन् ।

उनले विदेशबाट सहयोग गर्न चाहनेका लागि गिभ अ लिटलको लिंक शेयर गरेकी थिइन् । जसमा यो सामाचार तयार पार्दासम्म त्यहाँ ५० न्युजिल्याण्ड डलरभन्दा धेरै जम्मा भइसकेको छ । अहिलेको विनिमय दर अनुसार करिब ४३ लाख नेपाली रूपैंया हुन्छ ।

यस्तै नेपाल भित्रबाट उनलाई सहयोग उठिरहेको छ । नेकपा एमालेको भातृसंगठनले देशभरीबाट सहयोग उठाएर दिनका लागि अभियान सुरू गरेको छ । संगठनका अध्यक्ष दिपक धामीले पाँच हजार रूपैंया सहयोग गरी अभियान सुरू गरेका हुन् ।

यस्तै नेपाली कांग्रेसले पाँच लाख रूपैंया सहयवोग गर्ने निर्णय गरेको छ । एक्सट्रिम इनर्जी ड्रिंक्सले पनि पाँच लाख सहयोग गरेको छ ।

यस्तै कुलब्याइका नामले चर्चित पारस बमले अहिलेसम्म तीन लाख रूपैंया सहयोग गरेका छन् भने एन्फाका पूर्वअध्यक्ष कमल थापाले ५० हजार दिएका छन् । प्रगतिशिल लोकतान्त्रिक पार्टीका नेता तथा पूर्व पर्यटन मन्त्री सुदन किराँतीले १० हजार सहयोग गरेका छन् ।

नेपाली कांग्रेसका नेता सञ्चालक रहेको काठमाडौंको केएमसी मेडिकल कलेजले निशुल्क उपचार गर्ने प्रतिबद्धता जनाएको छ । तर, साम्बाले कतारमा उपचार गराउने स्पष्ट पारिसकेकी छिन् । उनको उपचारका लागि ८० हजार डलर आवश्यक छ ।

सरकारसँग पटकपटक आग्रह गर्दा पनि सफल नभएको भन्दै साम्बाले सोमबार फेसबुक मार्फत सहयोग गर्न समर्थकहरूलाई आग्रह गरेकी थिइन् ।

साम्बाको आग्रहपछि अखिल नेपाल फुटबल संघ एन्फाले भने उनको उपचारका लागि पहल गरिरहेको दाबी गरेको छ । एन्फा प्रवक्ता सुरेश शाहले सोमबार नै प्रेस विज्ञप्ति निकालेर साम्बा आबद्ध क्लब वेलिङ्टन फिनिक्स र परराष्ट्र मन्त्रालयसँग समन्वय भइरहेको जनाएका छन् । साथै, साम्बाले कतारमा उपचार गराउने चाहना राखेकाले कतार फूटबल एसोसिएसनसँग पनि कुरा भइरहेको उनले बताएका छन् ।

एन्फाले खेलाडीको उपचार क्लबले नै गर्ने अन्तर्राष्ट्रिय प्रचलन रहेको दाबी गर्दै क्लबले व्यहोर्ने बाहेकको खर्च एन्फाले गर्ने दाबी गरेको छ ।

तर, एन्फासँग पटकपटक पहल गर्दा पनि पाँच लाख रूपैंया मात्रै सहयोग गर्ने र प्रशासनिक सहयोग नगर्ने भनेपछि आफूले सार्वजनिक आव्हान गर्नुपरेको उल्लेख गरेकी छिन् । उनले फेसबुकमा लेखेकी छिन्, ‘ चोट लागेको ३ सातापछिको लागि क्लबको पहलमा शल्यक्रिया मिति तोकिएको भएपनि एन्फाले आफ्नो तर्फबाट प्रयास गर्ने बतायो । तर सो अनुसार एन्फाबाट प्रक्रिया अघि बढेन । मैले पटक पटक प्रयास गर्दापनि वहाँहरुलाई सम्पर्क गर्न कठिन भयो । अघिल्लो साता एन्फा अध्यक्ष आफैंले मेरो उपचारमा एन्फाबाट प्रशासनिक सहयोग गर्न नसकिने जानकारी दिनुभयो । वहाँले नगद ५ लाखसम्म सहयोग गर्ने र अन्य प्रक्रिया आफैं गर्न भन्नुभयो । एक त मैले यसअघि चालेको प्रक्रिया रोकियो, अर्कोतर्फ मैले झन्डै २ महिनापछि मात्र शल्यक्रिया मितिको लागि फेरी प्रयास गर्नुपर्ने भएको छ ।’

अष्ट्रेलियाको निन्जा-ए लिग खेल्ने न्युजिल्याण्डको क्लब वेलिङ्टन फिनिक्समा आबद्ध भएकी साम्बालाई खेलका क्रममा घुँडामा चोट लागेको थियो ।