काठमाडौं ।नेकपा एमाले महासचिव तथा दाङ-२ का उम्मेदवार शङ्‍कर पाेखरेलले  मतदातासँग भोट माग्दै आफूले विगतमा गरेका कामको विस्तृत फेहरिस्त सार्वजनिक गरेका छन्। ‘हामीले जे भन्यौं- पूरा गर्यौं’ भन्दै उनले बिहीबार विगतमा गरेका विकास निर्माणका उपलब्धिहरु सार्वजनिक गरे ।

पोखरेलले दाङलाई प्रदेशको राजधानी बनाउने संकल्प पूरा गरेको दाबी गर्दै लुम्बिनी प्रदेशको संस्थापक मुख्यमन्त्रीका रूपमा संघीयता कार्यान्वयनको नेतृत्व गरेको उल्लेख गरेका छन्।

दाङको पूर्वाधार विकासको आधार तयार गर्न महत्वपूर्ण भूमिका खेलेको बताउँदै उनले विभिन्न सडक तथा पूर्वाधार आयोजनाको डीपीआर तयार गरी कार्यान्वयन अगाडि बढाएको दाबी गरे ।

उनका अनुसार लमही-घोराही-अर्जुनखोला-मसोट सडक तथा वैकल्पिक मार्गको डीपीआर तयार भई काम अघि बढेको छ।

५० बिघा क्षेत्रफलमा औद्योगिक क्षेत्र स्थापना प्रक्रिया अघि बढाइएको, राप्ती स्वास्थ्य विज्ञान प्रतिष्ठानमा एमबीबीएस र एमडी पठनपाठन सञ्चालनको आधार तयार गरिएको तथा लमहीमा ट्रमा सेन्टर स्थापना पहल गरिएको उनले बताएका छन्।

त्यसैगरी, ‘बबई डाइभर्सन’ आयोजनाको बजेट सुनिश्चित गराई डीपीआर प्रक्रिया अघि बढाइएको, जिल्लाको पहिचान आधुनिक पूर्वाधार विकासमार्फत रूपान्तरण गर्ने अभियान सञ्चालन गरिएको तथा प्रमुख अस्पतालहरूमा रिफर सेन्टरबाट विशेषज्ञ सेवामा स्तरोन्नति गरिएको दाबी उनले गरेका छन्।

पोखरेलले त्रिभुवन विश्वविद्यालयअन्तर्गत इञ्जिनियरिङ अध्ययन संस्थान चौरजहारी क्याम्पस निर्माण प्रक्रिया अगाडि बढाइएको, प्रदेश राजधानीको गुरुयोजना निर्माण गरिएको तथा प्रदेशसभा भवन र स्थायी संरचना निर्माण अन्तिम चरणमा पुगेको उल्लेख गरेका छन्।

कृषि क्षेत्रमा स्मार्ट कृषि कार्यक्रममार्फत उत्पादन वृद्धि र किसानको आयआर्जनमा सुधार ल्याउने काम गरिएको, २०७० सालमा खोलिएको घोराही क्याम्पसलाई व्यवस्थित र सुविधासम्पन्न बनाइएको तथा चौधरी उपमहानगरपालिका वडा नं. १८ मा किरियापुत्री भवन निर्माण गरिएको पनि उनले जानकारी दिएका छन्।

त्यस्तै, घोराही बजार क्षेत्रमा सडक तथा फुटपाथ निर्माण, विभिन्न पुल तथा पूर्वाधार आयोजनाको सुरुवात र कार्यान्वयनले दाङको समग्र विकासमा टेवा पुगेको उनको दाबी छ।

पोखरेलले विगतका कामलाई निरन्तरता दिँदै आगामी दिनमा अझ तीव्र विकास गर्ने प्रतिबद्धता जनाउँदै सूर्य चिन्हमा मतदान गर्न मतदातासँग अपिल गरेका छन्।