झापा । नेकपा एमालेका अध्यक्ष केपी शर्मा ओलीले प्रतिनिधिसभा निर्वाचनमा नेकपा एमालेको जित सुनिश्चित रहेको दाबी गरेका छन् ।

झापा–५ का उम्मेदवारसमेत रहेका उनले एमालेले जिते मात्रै विकास र स्थायित्व सम्भव हुने बताए ।

निर्वाचन प्रचारका क्रममा बोल्दै उनले आफ्नो पार्टीप्रति जनताको विश्वास बढेको उल्लेख गरे। ‘यो चुनावमा हामीले जित्छौँ नै भन्ने मैले विश्वास लिएको छु। एमालेले जित्छ, एमालेले जित्यो भने काम गर्न सक्ने हो,’ उनले भने।

अन्य दलप्रति लक्षित गर्दै उनले एमालेबाहेकका शक्तिले विकासभन्दा अव्यवस्था निम्त्याउने आरोप लगाए। ‘अरुले त जलाउने भत्काउने हो, काम केही पनि हुनेवाला छैन,’ उनले दाबी गरे।

ओलीले एमाले सरकारमा आए निर्माण, संरक्षण र विकासका काम तीव्र रूपमा अघि बढाइने स्पष्ट पारे। ‘एमालेले बनाउँछ, जोगाउँछ। एमालेले अगाडि बढाउँछ कामहरू,’ उनले भने।

उनले सुकुम्बासी र अव्यवस्थित बसोबासीको समस्या समाधानलाई प्राथमिकतामा राख्ने प्रतिबद्धता व्यक्त गर्दै धनीपुर्जा वितरण तथा व्यवस्थित बसोबासको कार्यक्रम अघि बढाइने बताए।

अध्यक्ष ओलीले मतदातालाई विकास, स्थायित्व र सुशासनका लागि एमालेका उम्मेदवारलाई विजयी गराउन आह्वान गरेका छन्।