कञ्चनपुर। प्रतिनिधिसभा सदस्य निर्वाचनअन्तर्गत कञ्चनपुर निर्वाचन क्षेत्र नं १ मा जारी प्रत्यक्षतर्फको मतगणनाको पछिल्लो नतिजाअनुसार राष्ट्रिय स्वतन्त्र पार्टी (रास्वपा) का उम्मेदवार जनकसिंह धामीले अग्रता कायमै राख्नुभएको छ ।

निर्वाचन अधिकृत दामोदर घिमिरेका अनुसार हालसम्मको मतगणनामा धामीले ५ हजार ८९१ मत प्राप्त गर्नुभएको छ । उहाँका निकटतम प्रतिस्पर्धी नेकपा (एमाले) का उम्मेदवार तारालामा तामाङले २ हजार ६१८ मतले पछ्याई रहनुभएको छ ।

त्यसैगरी नेपाल कम्युनिष्ट पार्टीकी उम्मेदवार विना मगरले २ हजार ३०४ र मत प्राप्त गर्नु भएको छ । नेपाली कांग्रेसका उम्मेदवार गोपीप्रसाद उपाध्यायले १ हजार ५४५ मत प्राप्त गर्नुभएको छ ।

राष्ट्रिय प्रजातन्त्र पार्टीका उम्मेदवार दिल्लीबहादुर शाहीले ४३० मत प्राप्त गर्नुभएको छ भने उज्यालो नेपाल पार्टीका माइकल तामाङले ६२४ मत प्राप्त गर्नुभएको छ ।

उक्त निर्वाचन क्षेत्रमा १४ हजार ७३० मत गणना गरिएको छ । तीमध्ये १३ हजार ७९१ मत सदर भएका छन् भने ९३९ मत बदर भएको जनाइएको छ । निर्वाचन क्षेत्रमा चार स्वतन्त्रसहित १९ उम्मेदवार चुनावी प्रतिस्पर्धामा रहेका छन् ।

निर्वाचन क्षेत्रमा कुल १ लाख १ हजार ७२४ मतदाता रहेकोमा त्यसमध्ये ६१ हजार७४ मत खसेको थियो । अहिलेसम्म पुर्नवास नगरपालिकाको वडा नं १ देखि ८ वडा सम्मको सम्पन्न भएको छ । अन्य पालिकाको मतगणनाको कार्य अगाडि बढाइएको छ ।