दार्चुला। दार्चुलामा प्रतिनिधिसभा सदस्य निर्वाचनअन्तर्गत मतगणना सुरु भएको छ ।मुख्य निर्वाचन अधिकृतको कार्यालयका अनुसार सर्वदलीय बैठकले बेलुकी ७ः०० बजेदेखि मतगणना सुरु गर्ने निर्णय गरे पनि प्राविधिक तयारीका कारण ढिलाइ भएपछि भर्खंरै मतगणना सुरु गरिएको हो ।

जिल्ला सदरमुकाम खलङ्गास्थित महेन्द्र नमूना माविको भवनमा मतगणना भइरहेको छ । सुरुमा जिल्लाको व्यास गाउँपालिका-२ बाट मतगणना सुरु गरिएको मुख्य निर्वाचन अधिकृतको कार्यालयले जनाएको छ । मतपेटिका सङ्कलन र व्यवस्थापनको काम सम्पन्न भएपछि मतगणना प्रक्रिया अघि बढाइएको हो ।

बिहीबार सम्पन्न प्रतिनिधिसभा सदस्य निर्वाचनमा दार्चुलामा कुल ५३.७६ प्रतिशत मत खसेको थियो । जिल्ला निर्वाचन कार्यालयका अनुसार जिल्लाभरबाट ४९ हजार ९६८ मतदाताले मतदान गरेका छन् ।

यसैबीच, निर्वाचन शान्तिपूर्ण रूपमा सम्पन्न भएको जिल्ला प्रशासन कार्यालयले जनाएको छ । दुर्गम भूगोलका कारण केही उत्तरी क्षेत्रका मतदान केन्द्रबाट मतपेटिका नेपाली सेनाको हेलिकप्टरमार्फत सदरमुकाम ल्याइएको थियो भने अन्य स्थानबाट सुरक्षा निकायको निगरानीमा पैदल तथा सवारीसाधनमार्फत सङ्कलन गरिएको थियो ।

मतगणनास्थलमा सुरक्षा व्यवस्था कडा पारिएको मुख्य निर्वाचन अधिकृत भुवन गिरीले जानकारी दिनुभयो । मतगणना पारदर्शी र निष्पक्ष बनाउन राजनीतिक दलका प्रतिनिधि, निर्वाचन कर्मचारी तथा सुरक्षाकर्मीको उपस्थितिमा गणना भइरहेको उहाँले बताउनुभयो ।