काठमाडाैं। खाडी मुलुकहरूमा सामाजिक सञ्जालमार्फत अफवाह फैलाएको आरोपमा हालसम्म ७ नेपाली पक्राउ परेका छन्। इजरायल-अमेरिका र इरानबीचको युद्ध चर्किँदै जाँदा इरानले संयुक्त अरब एमिराट्समा मिसाइल तथा ड्रोन आक्रमण गरिरहेको भन्दै त्यहाँ खसेका क्षेप्यास्त्र वा ड्रोनका फोटो-भिडियो खिचेर सामाजिक सञ्जालमा अपलोड गरेको आरोपमा यूएई प्रहरीले नेपालीहरुलाई पक्राउ गरेको हो।

परराष्ट्र मन्त्रालयका प्रवक्ता लोकबहादुर पौडेल क्षेत्रीका अनुसार यूएईमा तीन, साउदी अरबमा तीन र कुवेतमा एक गरी जम्मा ७ नेपाली पक्राउ परेका छन्। उनले खाडी मुलुकका अधिकारीहरूबाट यही विवरण प्राप्त भएको बताए।

परराष्ट्र मन्त्रालयले युद्धसम्बन्धी दृश्य, ड्रोन वा मिसाइलका अवशेष, सुरक्षासम्बन्धी गतिविधि लगायतका फोटो-भिडियो नखिच्न र कुनै पनि अवस्था स्थिति सामाजिक सञ्जालमा पोस्ट नगर्न सर्वसाधारण नेपालीलाई पुनः आग्रह गरेको छ। मंत्रालयले यस्ता गतिविधिले स्थानीय कानुन उल्लंघन हुने र कडा कारबाही भोग्नुपर्न सक्ने चेतावनी पनि दिएको छ।