काठमाडौं । रास्वपा सभापति रवि लामिछानेविरुद्धको संगठित अपराध र सम्पत्ति शुद्धीकरण सम्बन्धी मुद्दा फिर्ता गर्ने महान्यायाधिवक्ताको निर्णयविरुद्ध दायर रिटमाथि सर्वोच्च अदालतमा आज पनि सुनुवाइ जारी छ। 

न्यायाधीश विनोद शर्मा र अब्दुल अजिज मुसलमानको संयुक्त इजलासमा हेर्दाहेर्दैमा रहेको यो मुद्दाको सुनुवाइ पछिल्ला केही दिनदेखि निरन्तर रूपमा चलिरहेको छ।

मंगलबार रिट निवेदकका तर्फबाट बहस सम्पन्न भएको थियो। आज भने महान्यायाधिवक्ता कार्यालयका सरकारी वकिलहरूले जवाफी बहस प्रस्तुत गर्ने तयारी गरेका छन्।

महान्यायाधिवक्ता सविता भण्डारीले पुस ३० गते लामिछानेका विषयमा अभियोगपत्र संशोधन गर्ने निर्णय गरेकी थिइन्। निर्णयप्रति आलोचना बढेपछि उनले माघ २ गते अन्य आरोपितहरूका हकमा पनि अभियोगपत्र संशोधनको निर्णय लिएको बताइएको छ।

यसअघि सर्वोच्च अदालतले मुद्दा फिर्तासम्बन्धी महान्यायाधिवक्ता कार्यालयको निर्णयसँग सम्बन्धित कागजात मागिसकेको छ।