काठमाडौँ। राष्ट्रिय स्वतन्त्र पार्टीका सांसद मनिष झालेले नेपालको लोकतन्त्रको बाँकी यात्रा अब म्याराथनको गतिमा होइन, १०० मिटरको दौड जस्तो तीव्र गतिमा पूरा गर्नुपर्ने बताएका छन्।

नवनिर्वाचित सांसदको रूपमा शपथ ग्रहणका लागि सिंहदरबार पुगेका उनले सञ्चारकर्मीहरूसँगको संवादमा देशको राजनीति र अर्थतन्त्रलाई गति दिन आगामी कार्यकाल चुनौतीपूर्ण र निर्णायक हुने उल्लेख गरेका छन्।

नेपालको लोकतन्त्रको ६६ वर्षको इतिहासलाई स्मरण गर्दै उनले भने, अबको केही वर्षमा दशकौँको उपलब्धि हासिल गर्ने गरी काम गर्नुपर्ने आवश्यकता रहेको छ। झाले विश्वका बदलिँदो राजनीतिक र आर्थिक परिवेशमा नेपालले आफ्नो गति तीव्र बनाउनुपर्ने वैकल्पिकता नरहेको स्पष्ट पारे।

‘हाम्रो ६६ वर्षको लोकतान्त्रिक यात्रालाई अब यो कार्यकालले अर्को दुई–तीन दशकको स्पीडमा लैजानुपर्छ,’ उनले भने, ‘म्याराथनको गतिले अब पुग्दैन, हामी १०० मिटरको स्पीडमा दौडेर बाँकी यात्रा तय गर्नुपर्ने अवस्थामा छौँ।’