काठमाडौँ । इन्डियन प्रिमियर लिग (आईपीएल)मा शुक्रबारको खेलमा पञ्जाब किङ्सले चेन्नई सुपर किङ्सलाई पाँच विकेटको जितसहित पराजित गरेको छ। यो पञ्जाबको लगातार दोस्रो जीत हो भने चेन्नई लगातार दोस्रो खेलमा पराजित बन्यो। 

पञ्जाबका लागि कप्तान श्रेयस ऐयरले उत्कृष्ट प्रदर्शन गर्दै अर्धशतक बनाए। प्रियांश आर्याले पनि ३९ रनको महत्वपूर्ण योगदान दिए। लगातार दोस्रो खेल जित्दा पनि पञ्जाबले मनग्गे खुसी मनाउन भने पाएन।

खेल सकिनासाथ भारतीय क्रिकेट कन्ट्रोल बोर्ड (बीसीसीआई)ले पञ्जाबका कप्तान श्रेयस ऐयरलाई स्लो ओभर रेटको कारण २४ लाख भारतीय रुपैयाँ जरिवाना तिराउने निर्णय गर्यो। निर्धारित समयभन्दा ढिलो बलिङ गराएको भन्दै यो कारबाही गरिएको हो।

कप्तान ऐयरसँगै अन्य खेलाडीहरूलाई पनि कारबाही गरिएको छ। उनीहरूको म्याच फिबाट २५ प्रतिशत रकम कट्टा गरिनेछ। चालु सिजनमा स्लो ओभर रेटकै आरोपमा ऐयरमाथि दोस्रो पटक जरिवाना लगाइएको हो।