एजेन्सी। संयुक्त अरब इमिरेट्सको अबुधाबीमा ड्रोन दुर्घटनामा घाइते भएका सात नेपालीमध्ये छ जना अस्पतालबाट उपचारपछि घर फर्किएका छन्। अबुधाबीस्थित नेपाली दूतावासले सामान्य उपचारपछि उनीहरू डिस्चार्ज भएको जानकारी दिएको छ।

सातमध्ये एक नेपालीको उपचार अझै अस्पतालमा भइरहेको छ। दूतावासका अनुसार, उनी पहिले गम्भीर घाइते भएको भनिए पनि हाल पूर्ण रूपमा खतरा रहित छन् र छिट्टै डिस्चार्ज हुने तयारीमा छन्।

दूतावासका अधिकारीहरूले सबै घाइतेको स्वास्थ्य अवस्थाबारे प्रत्यक्ष जानकारी लिएका छन्। उनीहरूले टेलिफोन सम्पर्क र चार घाइतेसँग प्रत्यक्ष भेट गरी विवरण संकलन गरेका छन्।

दूतावासले आवश्यक सहयोग र समन्वयका लागि निरन्तर काम गरिरहेको जनाएको छ। साथै, यूएई सरकारले घाइतेहरूको आवश्यक स्वास्थ्य उपचार उपलब्ध गराइरहेको पनि उल्लेख गरिएको छ।

‘गम्भीर घाइते हुनुभएका भनिएका व्यक्ति अस्पतालमा उपचार गराइरहनुभएको तर उहाँ पनि पूर्ण खतारामुक्त रहनुभएको र छिट्टै डिस्चार्ज हुने बताउनुभएको व्यहोरा जानकारी गराइन्छ,’ दूतावासले शनिबार जारी गरेको विज्ञप्तिमा उल्लेख छ ।

दूतावासले यूएई सरकारले जारी गरेको सुरक्षासम्बन्धी मार्गदर्शन र सूचनाको पूर्ण पालना गर्न नेपाली नागरिकहरूलाई अनुरोध गरेको छ।

‘अहिले मध्यपूर्वमा विकसित परिस्थितिको सन्दर्भमा संयुक्त अरब इमिरेट्समा रहनुभएका नेपाली नागरिकहरूलाई यूएई सरकारले जारी गरेको सुरक्षासम्बन्धी मार्गदर्शन तथा सूचनाहरूको पूर्ण रूपमा पालना गर्न अनुरोध गरिन्छ,” विज्ञप्तिमा उल्लेख छ, “साथै, आधिकारिक स्रोतबाट प्रकाशित सूचनाहरू मात्र विश्वास गर्न र त्यसैअनुसार सचेत रहन पनि सबैमा अनुरोध छ ।’

यो घटना शुक्रबार, अपिल ३ मा अबुधाबीको अजबन क्षेत्रमा भएको थियो। घटनामा पाँच भारतीय नागरिक पनि घाइते भएका थिए र उनीहरूको उपचार जारी रहेको सरकारी सञ्चारमाध्यमले जनाएको छ।