काठमाडौं। राष्ट्रिय स्वतन्त्र पार्टीकी सांसद समिना मियाँले सडक सुरक्षाका लागि तत्काल आवश्यक सुधारका कार्य अघि बढाउन सरकारको ध्यानाकर्षण गराएकी छन्। बुधबार प्रतिनिधिसभा बैठकमा आकस्मिक समयमा बोल्दै उनले सडक दुर्घटनामा बर्सेनि हजारौँ नागरिकको ज्यान जाने गरेको उल्लेख गर्दै सडक सुरक्षाका उपायहरू तत्काल कार्यान्वयन गर्नुपर्नेमा जोड दिएकी हुन् ।

उनले जलेश्वर-बर्दिबास सडक खण्डमा भएको मोटरसाइकल दुर्घटनामा एसइई परीक्षा दिएर घर फर्कँदै गरेका तीन जनाको मृत्यु भएको घटनाप्रति दुःख व्यक्त गरिन्। सांसद मियाँले जोखिमयुक्त सडक खण्डमा गति नियन्त्रणसम्बन्धी सूचना, समयमै सडक मर्मतसम्भार, ट्राफिक नियमको कडाइका साथ कार्यान्वयन, तथा युवा र विद्यार्थी लक्षित सचेतना कार्यक्रम सञ्चालन गर्नुपर्ने बताइन्।

उनले विद्यालयस्तरमै सडक सुरक्षासम्बन्धी अनिवार्य सचेतना अभियान सञ्चालन गर्न पनि माग गरिन्। साथै, आपत्कालीन उद्धार प्रणाली सुधार गर्दै दुर्घटना भएलगत्तै छिटो उद्धार र उपचार सुनिश्चित गर्न सरकारको गम्भीर ध्यानाकर्षण गराइन्।

यसै सन्दर्भमा उनले नीतिगत मागहरु समेत प्रस्तुत गारिन् ।