काठमाडौं।सरकारले सार्वजनिक यातायातको भाडादर बढाएको छ। इन्धनको मूल्यमा भएको उतारचढाव र विभिन्न सूचकहरूलाई आधार मानेर नयाँ भाडादर निर्धारण गरिएको हो।

नयाँ व्यवस्थाअनुसार यात्रुवाहक सवारी साधनको भाडामा १६.७१ प्रतिशतले वृद्धि गरिएको छ। त्यस्तै, मालवाहक सवारी साधनतर्फ पहाडी बाटोमा सञ्चालन हुने सवारीको भाडा २१.६८ प्रतिशत र तराई क्षेत्रमा सञ्चालन हुने सवारीको भाडा १५.७५ प्रतिशतले समायोजन गरिएको छ।

इन्धनको मूल्यमा आएको परिवर्तनलाई नै भाडा वृद्धिको मुख्य आधार मानिएको विभाग स्रोतले जनाएको छ। अब सर्वसाधारणले यात्रा गर्दा तथा सामान ढुवानी गर्दा नयाँ दरअनुसार शुल्क तिर्नुपर्नेछ।

यातायात व्यवस्था विभागले भाडा समायोजनका लागि मन्त्रालयमा प्रस्ताव पठाएको थियो। भौतिक पूर्वाधार तथा यातायातमन्त्री सुनील लम्सालले उक्त प्रस्ताव स्वीकृत गरेसँगै भाडा वृद्धि कार्यान्वयनमा आएको हो। अब विभागले औपचारिक सूचना जारी गरी जानकारी दिने तयारी गरेको छ।