काठमाडौं। पूर्वप्रधानमन्त्री तथा नेकपा एमालेका अध्यक्ष केपी शर्मा ओली आज रिहा हुने भएका छन्।

सर्वोच्च अदालतको आदेशअनुसार सरकारी वकिलको कार्यालयबाट जिम्मा जमानीमा छाड्ने कागजी प्रक्रिया पूरा भइसकेकाले प्रहरीले उनलाई रिहा गर्ने तयारी अघि बढाएको हो।

काठमाडौं प्रहरी परिसरका एसएसपी रमेश थापाका अनुसार ओलीलाई छाड्ने प्रक्रिया सुरु भइसकेको छ।

जेनजी आन्दोलनका क्रममा दमन गरेको आरोपमा उनलाई चैत १४ गते गुण्डुस्थित निवासबाट पक्राउ गरिएको थियो। स्वास्थ्य समस्या देखिएपछि उनी त्रिवि शिक्षण अस्पतालमा राखिएका थिए।

ओलीकी पत्नी राधिका र रमेश लेखककी पत्नी यशोदाले आफ्ना पतिहरूलाई गैरकानुनी रूपमा हिरासतमा राखिएको दाबी गर्दै सर्वोच्च अदालतमा बन्दीप्रत्यक्षीकरणको निवेदन दिएका थिए।

सर्वोच्च अदालतले चैत २३ मा अनुसन्धान चैत २६ भित्र टुंग्याउन आदेश दिएको थियो। तोकिएको समयभित्र अनुसन्धान पूरा नभएमा सर्तसहित रिहा गर्न पनि अदालतले निर्देशन दिएको थियो।

यद्यपि, अदालतले उनीहरूको हिरासतलाई गैरकानुनी ठहर गर्दै बन्दीप्रत्यक्षीकरणको आदेश जारी गर्ने माग भने अस्वीकार गरेको थियो।