काठमाडौं । पूर्वप्रधानमन्त्री तथा नेकपा एमालेका अध्यक्ष केपी शर्मा ओलीको पित्तथैलीको शल्यक्रिया आज हुँदैछ।

उपचारमा संलग्न चिकित्सकहरूले यसअघि नै आजका लागि शल्यक्रियाको मिति तय गरेका थिए। सोहीअनुसार पूर्वतयारी पूरा गरेर उनलाई अपरेसन थिएटरमा लगिएको अस्पताल स्रोतले जनाएको छ।

डा. पलेस्वाँ जोशी लाखेको नेतृत्वमा रहेको चिकित्सक टोलीले शल्यक्रिया गरी पित्तथैलीमा रहेको २२ एमएमको पत्थरी निकाल्ने तयारी गरेको छ।

यसअघि नयाँ सरकार गठन भएको भोलिपल्ट नै ‘जेनजी आन्दोलन’ दमन गरेको आरोपमा ओली पक्राउ परेका थिए। पक्राउ परेकै दिनदेखि उनी त्रिवि शिक्षण अस्पतालमा भर्ना भएका थिए।

ओली पक्राउ परेपछि उनकी पत्नी राधिका शाक्यले गैरकानुनी हिरासतमा राखिएको भन्दै सर्वोच्च अदालतमा बन्दी प्रत्यक्षीकरणको निवेदन दर्ता गराएकी थिइन्।

सर्वोच्च अदालतले चैत २३ गते बेलुका ओली र तत्कालीन गृहमन्त्री रमेश लेखकविरुद्धको अनुसन्धान चैत २६ भित्र टुंग्याउन आदेश दिएको थियो। साथै, तोकिएको समयभित्र अनुसन्धान नसकिए शर्तसहित रिहा गर्न पनि निर्देशन दिएको थियो।

सोही आदेशअनुसार प्रहरीले ओलीलाई अस्पतालबाट पत्नी राधिका शाक्यको जिम्मा लगाएको थियो। थुनामुक्त भए पनि शल्यक्रिया गर्नुपर्ने भएकाले उनी अस्पतालमै बस्दै आएका थिए।