काठमाडौं । प्रधानमन्त्री कप क्रिकेट अन्तर्गत एपीएफ क्लबका ओपनर आसिफ शेखले दुर्लभ कीर्तिमान कायम गरेका छन्।

नारायणी क्रिकेट मैदान, वीरगञ्जमा मधेश प्रदेशविरुद्ध जारी खेलमा उनले ऐतिहासिक दोहोरो शतक प्रहार गर्दै प्रतियोगिताको इतिहासमै नयाँ रेकर्ड बनाएका हुन्। यसअघि प्रतियोगितामा कुनै पनि खेलाडीले दोहोरो शतक बनाएका थिएनन्।

१४२ बलको सामना गरेका शेख २०८ रन बनाएर रिटायर्ड हर्ट भए। आफ्नो उत्कृष्ट इनिङ्समा उनले १५ चौका र १७ छक्का प्रहार गरेका थिए।

उनकै दोहोरो शतकको मद्दतमा एपीएफले मधेश प्रदेशलाई ३९१ रनको विशाल लक्ष्य दिएको छ, जुन प्रतियोगिताकै उच्च योगफलसमेत हो।

यसअघि यही संस्करणमा नेपाल पुलिस क्लबले एपीएफविरुद्ध ३५५ रन बनाएको कीर्तिमान थियो, जसलाई एपीएफले तोड्दै नयाँ इतिहास रचेको हो।