काठमाडौं। टेक उद्यमी एलन मस्कले विकास गरिरहेको नयाँ मेसेजिङ एप ‘एक्सच्याट’ आउँदो बिहीबारदेखि आईओएस प्रयोगकर्ताका लागि पूर्ण रूपमा उपलब्ध हुने भएको छ। फोन नम्बर बिना चल्ने र विज्ञापनरहित हुने दाबी गरिएको यो एपलाई मस्कले ‘सुपर एप’ बनाउने दीर्घकालीन योजनाको महत्वपूर्ण हिस्सा भनेका छन्।

‘एक्सच्याट’ प्रयोग गर्न कुनै फोन नम्बर आवश्यक नपर्ने बताइएको छ, जसले प्रयोगकर्ताको गोपनीयतामा केन्द्रित नयाँ विकल्प दिने अपेक्षा गरिएको छ। मस्कले यसलाई ‘एन्ड-टु-एन्ड इन्क्रिप्टेड’ प्रणाली भएको दाबी गरेका छन्।

नयाँ एपमा भ्वाइस नोट, ग्रुप च्याट (४८१ जनासम्म), अडियो-भिडियो कल, फाइल सेयरिङ, मेसेज एडिट तथा डिलिट गर्ने सुविधा रहेको बताइएको छ। साथै ५ मिनेटपछि स्वतः हराउने (डिसअपीयरिङ) मेसेज सुविधा पनि रहनेछ।

एपभित्रै ग्रोक एआई पनि एकीकृत गरिएको छ, जसले च्याटभित्रै विभिन्न काम गर्न सहयोग गर्ने दाबी गरिएको छ। एप ‘रस्ट’ प्रोग्रामिङ भाषामा निर्माण गरिएको बताइएको छ।

मस्कले यसलाई ‘बिटकोइन-शैलीको इन्क्रिप्सन’ भएको भने पनि सुरक्षा विशेषज्ञहरूले यसको व्याख्यामा प्रश्न उठाएका छन्। उनीहरूका अनुसार बिटकोइन र मेसेजिङ एपको सुरक्षा प्रणाली फरक हुने भएकाले उक्त दाबी प्राविधिक रूपमा विवादास्पद देखिन्छ।

त्यस्तै, एप्पलको एप स्टोर प्राइभेसी विवरणअनुसार एपले लोकेसन, सम्पर्क, सर्च हिस्ट्री जस्ता डेटा संकलन गर्न सक्ने संकेत पनि गरिएको छ।

यो एपको मुख्य प्रतिस्पर्धीका रूपमा ह्वाट्सएप र सिग्नल जस्ता लोकप्रिय मेसेजिङ प्लेटफर्महरूलाई हेरिएको छ। विज्ञहरूका अनुसार ‘एक्सच्याट’ ले बजारमा प्रवेश गरे पनि प्रयोगकर्ता विश्वास र सुरक्षा परीक्षणको विषय अझै चुनौतीपूर्ण रहनेछ।

फोन नम्बर बिना चल्ने, एआई एकीकृत र सुपर एपको अवधारणासहित आएको ‘एक्सच्याट’ले मेसेजिङ बजारमा नयाँ प्रतिस्पर्धा सिर्जना गर्ने संकेत दिएको छ।