काठमाडौं । अमेरिकाले प्रधानमन्त्री बालेन्द्र शाह (बालेन) र राष्ट्रिय स्वतन्त्र पार्टी (रास्वपा)का सभापति रवि लामिछानेबीच तनाव उत्पन्न हुन सक्ने दाबी गरिएको एक प्रतिवेदन सार्वजनिक गरेको छ ।

राजनीतिक विश्लेषकहरूको हवाला दिँदै बालेन र लामिछानेबीच तनाव उत्पन्न हुन सक्ने दाबी अमेरिकी कंग्रेसको अनुसन्धान गर्ने स्वतन्त्र निकाय कंग्रेसनल रिसर्च सर्भिसले दाबी गरेको छ ।

चुनावअघि बालेन र रविको गठजोडलाई परिस्थितिजन्य मिलन अर्थात् म्यारिज अफ कन्भिनियन्स भनेको छ । प्रतिवेदनमा यसलाई स्वार्थप्रेरित गठजोठ पनि भनिएको छ ।

बालेनलाई नेपालको संस्थापनविरोध अर्थात् पुराना दलहरू विरोधी र सुधारक नेताको रूपमा प्रतिवेदनमा औँल्याइएको छ । तर, उनी मेयर हुँदाको ट्याक रेकर्ड र शासकीय योजनामा स्पष्टताको कमी रहेको उल्लेख छ ।

हालै रास्वपा सभापति रवि लामिछाने र प्रधानमन्त्री बालेनबीच प्रतिनिधिसभाको उपसभामुखबारे मतभेद भएको थियो ।

लामिछानेले राप्रपा सांसद ज्ञानेन्द्र शाहीलाई भेटेर राप्रपाबाट उपसभामुख हुनुपर्ने भन्दै संवाद गरेका थिए ।

तर, प्रधानमन्त्री बालेन्द्र शाहले हर्क साम्पाङको दल श्रम संस्कृति पार्टी नयाँ दल भएको र उक्त दलसँग सहकार्य गर्न उपसभामुख उसैलाई दिनुपर्ने भनेका थिए ।

लामो रस्साकस्सीपछि बालेनको चाहनाअनुसार श्रम संस्कृति पार्टीलाई उपसभामुख दिन रास्वपा सहमत भयो । यसरी उपसभामुख कुन पार्टीबाट भन्नेमा बालेन र रविबीच तनाव उत्पन्न भएको थियो ।

त्यसअघि सभापति रवि लामिछानेले बाचापत्रमा सरकार गठन भएको १०० दिनमै सहकारीपीडितहरूको बचत फिर्ता गर्ने उल्लेख गर्दा बालेनले रविलाई फोन गरेर १०० दिनमा सम्भव नहुने र परामर्श बिना किन राखियो भन्दै कड्किएर सोधेका थिए ।

उनीहरुबीच समानुपातिक सांसद कसको कति हुने भन्नेमा पनि निकै रस्साकस्सीपछि बाँडफाँट भएको थियो ।

यिनै घटनाक्रमको पृष्ठभूमिमा सार्वजनिक अमेरिकी प्रतिवेदनले बालेन र रविबीच तनाव उत्पन्न हुने पूर्वानुमान गरेको हो ।