काठमाडौं। राष्ट्रिय पञ्जीकरणसँग सम्बन्धित सूचनाहरूलाई नागरिक एपमा एकीकृत गर्ने प्रक्रिया अघि बढाइएको छ। जन्म दर्ता, विवाह दर्ता, सम्बन्धबिच्छेद दर्तालगायतका विवरणहरूलाई एउटै प्रणालीमा समेट्ने काम सुरु गरिएको सूचना प्रविधि विभागका महानिर्देशक श्रीचन्द्र साहले जानकारी दिएका छन्।

उनका अनुसार हाल यी तथ्यांकहरूको एकीकरणका लागि प्रारम्भिक चरणको काम भइरहेको छ र केही समयभित्रै यसलाई कार्यान्वयनमा ल्याउने तयारी गरिएको छ। एकीकरण सम्पन्न भएपछि जन्म तथा विवाह दर्ताजस्ता प्रमाणपत्रहरू पनि नागरिक एपमार्फत सहज रूपमा उपलब्ध हुनेछन्।

सरकारले पछिल्लो समय डिजिटल सुशासनलाई बलियो बनाउने उद्देश्यले नागरिक सेवाहरूलाई अनलाइन माध्यमबाट विस्तार गर्ने अभियानलाई तीव्रता दिएको छ। यसै क्रममा निजामती कर्मचारीहरूको व्यक्तिगत विवरण, लोक सेवा आयोगका परीक्षार्थीहरूको प्रवेशपत्र तथा वैदेशिक अध्ययनका लागि आवश्यक ‘नो अब्जेक्सन सर्टिफिकेट’ (एनओसी) समेत नागरिक एपबाटै उपलब्ध गराउने व्यवस्था अन्तिम चरणमा पुगेको विभागले जनाएको छ।