काठमाडौं। थाइल्यान्डस्थित नेपाली दूतावासले कम्बोडियाबाट ४६ जना नेपाली नागरिकको उद्धार गरेको छ। उद्धार गरिएका सबैलाई सुरक्षित रूपमा स्वदेश फर्काइएको दूतावासले जनाएको छ।

दूतावासका अनुसार आकर्षक रोजगारीको प्रलोभनमा विभिन्न माध्यमबाट कम्बोडिया पुगेका ती नेपालीलाई त्यहाँ गैरकानुनी काममा लगाइएको सूचना प्राप्त भएपछि कम्बोडियाली सरकारको सहयोगमा उद्धार गरिएको हो।

दूतावासका तथ्याङ्कअनुसार सन् २०२१ मा १०१ जना, २०२२ मा १,९७७ जना, २०२३ मा २,९४० जना, २०२४ मा ६,४०४ जना तथा सन् २०२५ मा ९,६७६ जना नेपाली रोजगारीको खोजीमा कम्बोडिया पुगेका छन्।

दूतावासले श्रम स्वीकृति बिना कम्बोडिया, लाओस, म्यानमार र थाइल्याण्ड नजान नेपाली नागरिकलाई आग्रह गरेको छ। वैदेशिक रोजगारीका नाममा हुने ठगी र जोखिमबाट बच्न आवश्यक प्रक्रिया पूरा गरेर मात्र विदेश जान अनुरोध गरिएको छ।