काठमाडौं। गुगलले आफ्नो ब्राउजर गुगल क्रोममा जेमिनाई प्रयोगकर्ताका लागि ‘स्किल’ नामक नयाँ फिचर ल्याउन थालेको छ। डेस्कटप क्रोममा क्रमशः रोलआउट भइरहेको यो सुविधाले प्रयोगकर्तालाई बारम्बार प्रयोग हुने जेमिनाई प्रम्प्टहरू सेभ गरेर छिटो प्रयोग गर्न मद्दत गर्नेछ।

नयाँ फिचरमार्फत प्रयोगकर्ताले च्याट हिस्ट्रीबाटै मनपर्ने प्रम्प्टलाई ‘स्किल’ का रूपमा सेभ गर्न सक्नेछन्। सेभ गरिएका स्किल प्रयोग गर्न स्ल्यास (/) टाइप गर्न वा प्लस बटन क्लिक गरेर आवश्यक स्किल छनोट गर्न सकिने व्यवस्था गरिएको छ।

कम्पनीले केही पूर्वनिर्धारित प्रम्प्टहरू पनि उपलब्ध गराएको जनाएको छ। एकपटक सेभ गरिएका स्किलहरू प्रयोगकर्ताको गुगल खातामा साइन इन भएको कुनै पनि डेस्कटप क्रोममा प्रयोग गर्न सकिनेछ। हालका लागि यो सुविधा यूएस इङ्लिस ब्राउजर भाषा सेट गरेका प्रयोगकर्ताहरूमा मात्र उपलब्ध छ।

पछिल्ला महिनाहरूमा जेमिनाई एआई लाई क्रोममा विशेष प्राथमिकता दिँदै आएको गुगलले यसअघि नै जेमिनाई साइडबार पनि थपिसकेको छ। जसबाट नानो बनाना जेनेरेसन सुविधा प्रयोग गर्न सकिन्छ।

हालै गुगलले जेमिनाई इन क्रोमलाई क्यानडा, भारत र न्युजिल्यान्डका प्रयोगकर्तासम्म विस्तार गर्न थालेको छ। एआई प्रतिस्पर्धा तीव्र बन्दै जाँदा कम्पनीले आगामी दिनमा अझ धेरै एआई-आधारित सुविधा थप्ने अपेक्षा गरिएको छ।