काठमाडौं। मेडिकल व्यवसायी दुर्गा प्रसाईँले सरकारले गरिब नागरिकमाथि लुटपाट मच्चाएको आरोप लगाएका छन्। समसामयिक राजनीतिक विषयमा पत्रकार सम्मेलन गर्दै उनले सदन प्रतिपक्षविहीन बनेको दाबी पनि गरेका हुन्।

उनका अनुसार हर्क साम्पाङ नेतृत्वको श्रम संस्कृति पार्टी प्रतिपक्षको रूपमा रहने अपेक्षा भए पनि सरकारमै सहभागी भएकाले सदनमा प्रभावकारी प्रतिपक्ष नरहेको अवस्था बनेको छ। उनले प्रमुख प्रतिपक्षी दलहरू पनि बोल्न नसक्ने अवस्थामा रहेको आरोप लगाए।

प्रसाईँले निर्वाचन परिणामपछि सबै दल संकटमा रहेको र केही दल विभाजनको अवस्थामा पुगेकाले जनताको पक्षमा आवाज उठाउन नसकेको बताएका छन्। सरकारको विकासका गतिविधि सामाजिक सञ्जालमै सीमित भएको उनको भनाइ छ।

त्यसैगरी उनले काठमाडौँ महानगर प्रमुख बालेन शाहप्रति आक्रामक टिप्पणी गर्दै तीन महिना चुप बस्न आग्रह गर्दा पनि नसकेको उल्लेख गरे। उनले हिन्दु अधिराज्य कायम गर्ने, एसपीपी र एमसीसी खारेज गर्ने भए सरकारलाई साथ दिन आफू तयार रहेको बताए।

डीडीसीले किसानको करिब ९ अर्ब रुपैयाँ भुक्तानी गर्न बाँकी रहेको र स्वास्थ्य बीमाको १९ अर्ब रुपैयाँ पनि नतिरेको भन्दै उनले सरकारको ध्यानाकर्षण गराएका छन्।