काठमाडौं।  राष्ट्रिय स्वतन्त्र पार्टी (रास्वपा)को सचिवालय बैठक आज आइतबार दिउँसो ३ बजे वनस्थलीस्थित पार्टी मुख्यालयमा बस्ने भएको छ। बैठक सभापति रवि लामिछानेको आह्वानमा बस्न लागेको हो।

बैठकमा पार्टीको सांगठनिक विस्तार, महाधिवेशनको तयारीसहित विभिन्न विषयमा छलफल हुने जनाइएको छ। जिल्ला अधिवेशन कार्यविधि २०८३ पारित गर्ने तथा महाधिवेशन कार्यविधि मस्यौदा समिति गठन गर्ने विषयमा निर्णय हुने अपेक्षा गरिएको छ।

त्यसैगरी, आर्थिक पारदर्शिता सुनिश्चित गर्न बैंक खाता सञ्चालनसम्बन्धी व्यवस्था, केन्द्रीय आयोग, सल्लाहकार परिषद्, संघीय नेतृत्व मञ्च र विभिन्न विभागहरूको मनोनयनबारे पनि छलफल हुने बताइएको छ।

यसका साथै विज्ञहरूको सुझाव संकलन, योजना निर्माण तथा समसामयिक विषयहरू पनि बैठकका एजेन्डामा समावेश गरिएका छन्।