काठमाडौं। राष्ट्रिय स्वतन्त्र पार्टी (रास्वपा) ले भूपदेव शाहलाई महामन्त्री बनाउने तयारी गरेको छ । सोमबार बस्ने केन्द्रीय समिति बैठकमा शाहलाई महामन्त्री बनाउने प्रस्ताव अघि बढाउने तयारी गरिएको हो।

स्रोतका अनुसार,शाहलाई महामन्त्रीको रूपमा बैठकमा प्रस्ताव पेश हुने कार्यसूची रहेको छ।  सम्भवत: त्यो सोमबार कै बैठकले पारित पनि गर्नेछ।

तत्कालिन काठमाडौं महानगरपालिकाका मेयर बालेन शाहले पद छाडेर रास्वपा प्रवेश गर्दा भूपदेव पनि उनीसँगै सचिवालयमा रहेका थिए ।

यसअघि भएको सहमति अनुसार महामन्त्रीमा सुनिल लम्साल थिए भने भूपदेव सहमहामन्त्री रहेका थिए । लम्सालले मन्त्रीको जिम्मेवारी सम्हालेपछि भूपदेवलाई पार्टीको महामन्त्री बनाउने तयारी गरिएको स्रोतले बताएको छ ।

प्रमुख स्वकीय सचिवका रूपमा काम गरेका उनी बालेनका निकट पात्र मानिन्छन् । रास्वपासँग एकीकरण प्रक्रियाका क्रममा उनी पार्टीको केन्द्रीय सदस्य बनेका थिए ।

पछिल्लो पटक फागुन २१ मा भएको प्रतिनिधिसभा निर्वाचनमा उनी अछाम क्षेत्र नम्बर २ बाट उम्मेदवार बनेका थिए । तर उनी निर्वाचनमा पराजित भएका थिए ।